WALA na’y pasyente nga positibo sa coronavirus disease (Covid-19) nga taga Cagayan de Oro sa pagkakaron human nga ang resulta sa repeat swab sample sa nag-inusarang nagpositibo sa Covid-19 nga gikan sa siyudad negatibo na.
Sa kasamtangan, duna nalang duha ang nahabilin sa Northern Mindanao Medical Center (NMMC) nga positibo sa Covid-19 apan kini dili taga dinhi sa dakbayan diin ang usa niini taga Lanao del Norte ug taga Misamis Occidental.
Nasayran nga ang 71 anyos nga lalaki nga residente sa usa sa mga numbered Barangay sa Cagayan de Oro ang recovering karong panahona ug nakagawas na sa ospital.
Gibutyag ni Dr. Jose Chan, Medical Director sa NMMC nga si patient PH597 ang ikaduha na nga nakuhaan og sampol diin niadtong Marso 24 nagpositibo kini ug niining Abril 7 negatibo na kini.
Gidugang pa ni Chan nga sukwahi kaniadto nga kinahanglan og duna ka negatibo nga resulta ang kinahanglan apan karon usa igo na aron madeklara kining recovered.
“Sakto na ang usa ka negative result para maka declare ta og ang pasyente recovered na from the disease,” matud ni Chan.
Kahinumdoman nga duna kini kasaysayan sa pagbiyahe sa Manila niadtong Marso 7 ug niabot sa siyudad Marso 12.
Duna usab kini pre-existing conditions o balatian nga gihambing sama sa benign prostatic hyperplasia, hypertension,ug chronic cardiac diseases kinsa stable na ang kondisyon sa pagkakaron.
Karong panahona dunay nahabilin nga siyam ka mga pasyente sa NMMC diin tulo niani ang severe acute respiratory illness (SARI) ug unom ang patients under investigation (PUIs).
Samtang usa sa SARI ang namatay nga pasyente buntag sa Abril 8 nga taga Calaanan apan negatibo ang resulta niini sa maong virus