LISOD ang kustombre sa pagpanguyab kaniadto, sulti sa nag-una kanato. Di madalidali ang pagpamisita sa sa balay sa babaye. Sa baylehan, distansya ang lakake ug babaye kini magsayaw. Makahikap lang ang lalake sa babaye kon ang tukar sweet music.
Bisan sweet music, distansya gihapon ang lalake ug babaye. Dihay lalake nga nigakos og hugot sa babaye. Nihunghong kaniya ang babaye, “Pulis ra ba akong papa.” Distansya dayon ang lalake. Nidugang ang babaye, “Pero retired na.” Balik na sab og gakos ang lalake. Dugang na sab ang babaye, “Retired na pero naa gihapoy.45.”
Kon dunay karon tungod sa coronavirus, duna say distansya kaniadto. Ang ubang mga babaye kinahanglan pang haranahan. Kon makauyon, una pa pasak-in ang lalake. Kon di, makaligo ang nangharanna sa sud sa arinola ni mama.
Usahay mosangpot kini sa harana nga bugal-bugal alang niadtong lisod panguyaban. Ang labing yabag naoy pakantahon. Ubanan pa sa bahakhak nga bugal-bugal. Kining matang sa pagkanta nga yabag ug sintonado ug klaong gitumong sa pagbugalbugal gitawag nga 'charivari.'
Gisilotan kini ubos sa Article 155, Revised Penal Code nga nagkanayon, “Alarms and scandals. (1) The penalty of arresto menor orca fine not exceeding P209 shall be imposed upon: (2) Any person who shall instigate or take an active part in any charivari or other disorderly meeting offensive to another or prejudicial to public tranquility.”
Klaro nga gipasar ang maong balaod sa wa pa mosikat ang kanta ni Frank Sinatra nga “My Way.” Daghan nang mga sintonado og tingog nga nikanta niini nga nangamatay kay gipusil o gidunggab sa namunaw nga wa kauyon. Giingnan na kang unta, “Nindota nimong itip oy, itipon sa baka.”
Ang local government units nagpasar og mga ordinansa nga naglatid sa mga reglamento sa operasyon sa videokes. Apil niini ang limitasyon kon unsang orasa sila kutob. Way reglamento sa mga sintonado og tingog.
Ang samang balaod nagsilot usab niadtong magpabuto sa pusil, kwitis, rebentador ug ubang mga eksplosibo. Gisilotan usab kadtong magsuroy-suroy sa panahon sa kagabhion ug makadisturbo sa kalinaw. Lakip sa gisilotan mao ang mga hubog nga makadisturbo ug mag-iskandalo sa mga pangpublikong lugar.
Unsa man kining iskandalo? Mao kini ang butang o aksyon nga supak sa moralidad. - edbarrita@gmail.com