WALA pa ma-release sa beneficiaries ang Social Amelioration Fund (SAF) nga tag P6,000 matag household sa region 7, puwerting samuka na. Daghan na kaayo ang mga reklamo ug yawyaw gikan sa mga tawo nga posibleng dili makabenepisyo niini.
Mipagawas og guidelines ang Department of Social Welfare and sevelopment (DSWD) apan puwerting ka-komplikado. Nganong komplikado? Walay klaro kon si kinsa gyud ang qualified sa maong cash assistance.
Apil sa beneficiaries mao ang beneficiaries na sa Pantawid Pamilyang Pilipino Program (4Ps). Apan kadtong 4Ps members nang daan, pun-an na lang ang ilang unang gidawat. Dili na ang kinatibuk-ang kantidad nga P6,000. Apil tuod ang senior citizens ug solo parents. Apan kon ang senior citizens nga adunay anak nga nagtrabaho og adunay income, disqualified na. Apil tuod ang mga habalhabal og pedicab drives apan kon ang ilang mga asawa adunay income, disqualified gihapon.
Alang kuno sa mga informal economy sector. Kadtong mga ‘homeless’ o walay balay. Unsa mang klaseng ‘homeless’? Kadtong naa sa daplin sa kalsada nangatulog ba ang ilang buot ipasabot sa ‘homeless’? Unya kadtong renters o nag-abang lang, wala man to silay balay, apil to sila? Mireklamo usab ang mga middle class o bisan ang nga adunay ikasarang. Nganong wala man silay labot nga apektado man usab sila sa Covid 19 unya mas nagbayad pa sila og buhis?
Unya mao lagi na nga dili tanan ang makabenipisyo. Gumikan kay gipili og gihashasan gyud og maayo. Dinhi lang sa dakbayan sa Sugbo, 120 mil kapin lang ka households, dili individual ha, ang makadawat. Unya sa Mandaue City 55 mil lang. Adunay total nga 1.3 million lang ang makadawat sa tibuok Central Visayas. Puwerting daghanang pobre dinhi.
In fairness sa local government officials, sa DSWD ni. Ang local government units (LGUs) lang ang gitahasan sa paglista sa beneficiaries kay sila maoy nasayod sa ilang mga lumolupyo. Aw, sa dili mahatagan sorry na lang. (bobbygnalzaro@gmail.com)