NAGDUDA si Porferio Daclan Jr., 70, taga-Barangay Babag, dakbayan sa Lapu-Lapu ang giila nga ‘Patient LLC-01’ nga posibleng nakuha niya ang coronavirus disease 2019 (Covid-19) sa usa sa mga mall niadtong higayon nga wa pa ipatuman ang enhanced community quarantine (ECQ) sa Sugbo.
“Kada adlaw nga tua ko sa mall. Tingali sa CR, kanang mosud ka sa CR nya tuay sige og ubo mahibilin ang kagaw nga gibugwak unya ikaw nakapuli,” tipik sa asoy ni Daclan atol sa live interview sa DYSS Super Radyo, kagahapon, Abril 8.
Matod pa sa septuagenarian dili niya batasan nga mo-stand by sa coffee shop uban sa kaubang senior citizens kay, matod pa, focus siya sa iyang gamay nga negosyo ug pamilya, busa wa siyay laing gidudahan labaw na nga wa siyay travel history.
Sa dihang nagpositibo siya sa maong virus tumang kabalaka ang gibati sa iyang kabanay sa dihang aduna na siyay nga gihambin daan nga sakit sama sa diabetes, hypertension ug chronic obstructive pulmonary disease.
“Lord, Ikaw nalay mag-igo unya sa akong pamilya,” ampo ni Daclan Jr. kinsa gidala sa University of Cebu Medical Center (UCMed) sa Mandaue City niadtong Marso 19
Niadtong Abril 5 na-discharge siya sa maong tambalanan sa dihang na-ayo sa maong balati-an.
Dako ang iyang pasalamat sa team sa mga doktor nga mi-atiman kaniya diin kabahin ang iyang anak nga si Dr. Francis nga usa ka internal medicine specialist sa UCMed.
Apan ang labing epektibo nga tambal alang ni Porferio mao ang iyang hugot nga pagtuo sa Diyos ilabi na nga ang iyang pamilya deboto ni San Vicente Ferrer.
“Dili tungod kay duna kay grabe nga experience diha pa ta mosangpit Niya. Dili ta na paabuton nga mahinumdom lang Kaniya og magkinahanglan nata,” tambag ni Porferio.
Inay nga molikay ang mga silingan ni Porferio atol sa iyang pagpauli sa ilang balay gikan sa ospital wa siya magdahom sa gipakita nga kahinangop sa iyang mga silingan nga nagbitbit og placard gikan sa highway ngadto na sa sudlunon nga bahin sa kalsada diin nahimutang ang iyang balay.
Apan siya misabot niadtong uban nga bation og kahadlok nga mopaduol kaniya.
“Sige lang, kay wa man na tuyo-a nga magpa covid covid. Ato nalang na dawaton sa way pagkusmod,” saysay sa maong Covid-19 survivor nga mipa-abot sa iyang pasalamat sa lokal nga kagamhanan nga mi-abag niya ug sa iyang kabanay.