IPATAKTAK gyud sa serbisyo ni Police Regional Office (PRO) 7 director Police Brigadier General Albert Ignatius Ferro ang pulis nga sakop sa Waterfront Police Station sa dakbayan sa Sugbo nga nadakpan sa entrapment operation niadtong Martes sa hapon, Abril 7.
Si Police Corporal Wenefredo Olongayo nadakpan sa mga sakop sa Integrity Monitoring and Enforcement Group inabagan sa Regional Special Operations Group 7 sa Sitio Silangan 1, Barangay Tejero human mangayo’g aircon sa igsuon sa iyang dinakpan sa ilegal nga drugas.
Matod ni Ferro nga mag atubang og kasong riminal ug administratiba si Olongayo ug iyang gipaniguro nga mataktak kini sa serbisyo.
“We will file the necessary case against this person and ipapa dismiss nato katong police nato,” sigun ni Ferro.
Nasagmuyo ang heneral nga ning panahon sa krisis nga nag atubang ang tanang tawo sa makamatay nga virus aduna usab siyay mga sakop nga mipahimulos niini.
Kanunay na siya nga mipahimangno nga dili mag binuang sa trabaho sama nalang sa pagdawat og payola gikan sa illegal nga drugas ug illegal nga sugal.
“Mo-file ta og kaso sa police kay during this time of crisis ang atung mga badlongon nga mga police nag take advantage sila, illegal drugs man to iyang gi extortan, ako talaga di ko maisip nga naay mga police nga mag take advantage ba karong panahuna,” dugang ni Ferro.
Ang pagka sikop ni Corporal Olongayo mahimong leksyon sa tanang police sa Central Visayas nga dili gyud mo sulod sa bisan unsang matang sa ilegal nga kalihukan.
Nagtuo si Ferro nga aduna pay mga pulis dinhi nga wala pa mausab sa ilang kaugalingon nga maoy hinungdan nga iyang gitinguha nga ma desiplina niya ang mga personnel nga nalambigit sa illegal nga kalihukan.
Dugang sa heneral nga ang iyang palisiya nga gipatuman sa iyang administrasyon mao ang good cop nga maoy rason nga nag umol siyag amego cop nga mag hulagway sa mga police nga buotan.
“Kaya nag himo tag name nga amego cop dili to kalaban, amego dili extortionist,” dugang ni Ferro.
Gipa imbargohan na usab sa iyang service firearms ang police ug gibalhog sa PRO7 detention cell samtang nagpaabot nga pasakaan og kaso sa iyang mga kauban. (AYB)