KON usa ang inyong kompaniya sa 528 ka estabilisemento nga gi-aprobahan sa Department of Labor and Employment (Dole) 7 nga makadawat sa Covid-19 Adjustment Measures Program (Camp), ikaw mismo makadawat og P5,000 pinaagi sa money remittance nga ipadala sa ahensiya nimo.
Kon unsa nga estabilisemento, tan-awa sa official website sa Dole o tawag sa naasoy nga buhatan.
Mao kini ang gipahibawo sa Dole 7 nga niabot na sa P53,975,000 ang hinabang nga ilahang nahatag sa 10,795 ka kawani sa rehiyon nga apektado niining krisis karon sa nasod nga coronavirus pandemic.
Human gi-release sa Dole 7 ang P10,770,000 sa 2,154 ka mga kawani sa 56 sa kompaniya sa Central Visayas niadtong Marso 30, aduna’y laing P43,205,000 ang gikatakdang i-release sa dugang 8,641 ka mga kawani gikan sa 472 ka kompaniya sa rehiyon sa datus sa Dole 7 hangtod Abril 7.
Matod sa tigpamaba sa Dole 7 Luchel Taniza nga gipaagi nila sa money remittance centers ang pag-release sa P5,000 diin direkta kini ngadto sa mga kawani.
“Ang money, will be claimed directly by the workers thru a money remittance center. Approved companies will be informed very soon kung ready na para pud maka inform sila sa workers. Each worker will have his/her transaction code,” si Taniza nagkanayon.
Dugang niini nga ang mga field offices mao ang mopahibawo sa kompaniya kon naaprobahan ang ilahang Camp application ingon man kon andam na ang hinabang nga P5,000 matag kawani.
“We still have to wait for the confirmation of receipt from the money remittance center. Only then the Field offices concerned can notify companies,” matod ni Taniza.
Niabot na sa P53,975,000 ang kantidad nga hinabang nga natunol sa Dole 7 sa 10,795 ka kawani gikan sa 528 ka establisyemento sa Abril 7 nga datus niini sukad sila nanawat og aplikasyon niadtong buwan sa Marso.
Dugang ni Taniza nga mopagawas na usab sila og bag-ong lista karong adlawa, Abril 9, diin mosaka pa ang kantidad ug gidaghanon sa mga matabangan sa gobyerno pinaagi sa Camp.
Giklaro usab sa sa Dole 7 nga bisan og dili minimum wage apan kon ni-apply sa ilahang ahensiya og flexible work arrangement subay sa ilahang Labor Advisory 9 o kaha temporaryo nga nagsira ang ilahang kompaniya subay sa Covid-19 pandemic, mamahimong mo-apply.
Padayon ang pagpanawat nila og aplikasyon bisan paman sa mga holidays karong Semana santa.
Dugang ni Taniza nga mamahimo rang mo-send gihapon og aplikasyon ang tanang kompaniya o establisyemento nga apektado sa ilahang email nga mamahimong makita sa ilang website o sa ilahang Facebook Page.
Wala sila’y deadline pa kon hangtod kanus-a sila manawat apan makapasalig ang ilahang ahensiya nga nagtutok ang ilang team aron mapadali ang validation ug releasing niining hinabang sa mga apektado nga kawani ug kompaniya. (HBL)