DSWD-Central Visayas: Dili na gikan namo ang 262,000

GIKLARO ni Department of Social Welfare and Development (DSWD)-Central Visayas Assistant Regional Director for Operations Shalaine Marie Lucero nga dili gikan nila ang figure nga 262,000 nga beneficiary target sa Social Amelioration Program alang sa dakbayan sa Sugbo.

Matod ni Lucero nga wala sila misaysay niana nga gidaghanon ingon man gipasabot pa niini sa konseho atol sa special session sa mga konsehal niadtong Lunes ang target number sa SAP beneficiaries sa Cebu City.

Dugang niini nga aduna'y 149,514 ka mga informal poor households ang ilahang gihatag nga target beneficiary sa dakbayan sa Sugbo.

Sa maong gidaghanon, 10,032 niini ang Pantawid Pamilyang Pilipino Program (4Ps) beneficiaries diin una kining nahatagan og hinabang sa DSWD-Central Visayas pinaagi ang ilahang cash cards.

Lakip sa 149,514 ang 16,508 ka mga beneficiaries sa Unconditional Cash Transfer (UCT) Program.

Ang nahabilin nga 122,974 mao na kini ang balanse nga kinahanglan nga pangitaan sa Cebu City Government og mga beneficiary aron mahatagan sa P6,000 nga hinabang matag household o pamilya.

Giklaro usab ni Lucero nga mamahimo nga mohatag og Social Amelioration Card ang Cebu City Government alang sa mga pamilya nga masuta nila nga angayan nga hatagan sa maong hinabang apan moagi pa kini sa proseso.

Lakip sa proseso mao ang pagsumiter sa sobra sa target ngadto sa ulohang buhatan sa DSWD ingon man sa Office of the President aron ma-validate og angayan ba nga mahatagan ug kon aduna'y igong pundo nga matagaan niini.

Nakasabot usab si Lucero nga daghang eligible nga anaa sa kabus nga kahimtang ang anaa sa dakbayan sa Sugbo apan gatuo usab kini nga mayoriya sa kabus sa dakbayan ang makapahimulos niining SAP subay niining krisis sa Covid-19 pandemic.

Gipahibawo usab ni Lucero nga anaa na sa Cebu City Government ug mamahimo nang sugdan sa mga barangay ang pagsuta sa mga angay nga hatagan niining hinabang ingon man kinahanglan kini paspasan aron mahatag na ang alang sa buwan sa Abril.

Duha ka buwan kining SAP diin cover niini ang Abril ug Mayo. (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph