SA HIGAYON nga mahibalik na sa normal ang sitwasyon sa nasod, porsigido si kanhi World Boxing Council (WBC) super flyweight champion Gerry Penalosa sa pagpahigayon og boxing promotion sa dakbayan sa Mandaue.
Target ni Penalosa, chief executive officer (CEO) sa GerryPens Promotion, nga ang iyang pag-umangkon nga si Dave "The Hunter" Penalosa paawayon og usa ka haponanon nga fighter sa main event sa bulan sa Hulyo.
Karong buwana na unta kini ipahigayon, apan gumikan sa pagsi-aw sa coronavirus temporaryong gikanselar ang maong kalihukan.
Niadtong Disyembre 14, si Dave yanong mi-knockout ni Virgil Puton sa Cotabato sulod lang sa first round didto sa Elorde Sports Complex.
Kadto maoy iyang unang away human sa iyang unang kapildihan batok ni Lerato Dlamini sa South Africa pinaagi sa unanimous decision alang sa bakanting WBC Silver featherweight title sa miaging Hulyo 12, 2019. (JBM)