ANG presidente sa Philippine Tennis Association (PTA) sulod sa hataas nga panahon nga si Salvador "Buddy" Andrada ang mipanaw na sa laing kalibutan kagahapon sa buntag human kini ataki sa sakit sa kasingkasing.
Siya nagpangidaron og 83- anyos. Si Andrada gihulagway nga maoy usa sa dakong haligi sa natad sa tennis sa nasod nga nakalingkod isip pinakataas nga opisyal sa PTA gikan sa 1986 ngadto na sa 2005.
Nahimo usab siyang commissioner sa Philippine Sports Commission. Usa sa iyang mga legasiya mao ang Andrada Cup Age Group tournament nga gitumong aron pagpahanas sa mga batan-on ug potensiyal nga mga tennis players.
Kini maoy pinakataas ug dugay nga tournament sa Pilipinas diin milungtad sulod sa 30 ka tuig. Siya usab ang unang Filipino nga nahimong presidente sa Asian Tennis Federation nga natukod sa tuig 1964 sa Manila. (JBM)