MOKABAT na og 17 ka tuig gikan sa iyang pagretiro, apan daw og lab-as pa gihapon sa panumdoman ni Edward Naron ang iyang kasinati-an niadtong mga adlaw nga aktibo pa siya sa Philippine Basketball Association (PBA).
Si Naron, lumad nga taga Baclayon, Bohol apan dinhi sa Sugbo mahashas ang kalantip ubos sa University of the Visayas (UV) Green Lancers, orihinal nga gi-draft sa Gordon's Gin (Ginebra) isip ikapito sa overall pick sa 1997 PBA Draft. Apan pipila lang ka adlaw gikan sa drafting nabalhin kini ngadto sa San Miguel Beer.
Tuod man milanat og duha ka tuig ang iyang pagpakigsandurot sa Beermen diin iyang gikauban ang mga inila ug sikat nga basketbolista sa nasod niadtong panahona. Kini sama kanila ni Nelson Asaytono, Samboy Lim, Olsen Racela, Paul Alvarez, Yves Dignadice ug Freddie Abuda.
Apan ingon og sa kalit lang mingi-ob ang dagan sa karera ni Naron human makaangkon og injury sa iyang likod (slip disc) nga nagkinahanglan og operation. Dinhi nawad-an siya og lingkuranan San Miguel.
Apan wa usab magdugay, miabli ang laing ang-ang sa oportunidad, ug ning higayona nahitapo na siya sa Barangay Ginebra diin iyang gikaabot sila si Marlo Aquino, ang iyang idolo nga si Allan Caidic, Bal David, Noli Locsin, Jayjay Helterbrand, ang Sugboanong si Danny Aying, Mark Caguioa ug Alex Crisano.
Dinhi iyang nahimo ang usa sa mga butang nga lisod papason sa iyang panumdoman.
"Memorable nako kadtong kontra namo Alaska. Sila Rhoel Gomez, Jolas (Jojo Lastimosa), Jun Reyes, Johnny Abarrientos, Bong Hawkins. Mi-score ko'g 18 puntos kay gi pasige ko'g post ni coach Rino Salazar kay mismatch man nako sila si Jun ug Johnny. Mas taas man ko nila. Daug mi adto nga duwa," lakbit-saysay 6-1 nga pointguard kinsa kausa ka higayon maoy kampiyon sa buzzer-beater competition sa PBA All-Star Game.
Sa 2003, uban sa iyang kapikas sa kinabuhi nga si Vilma Hortillano-Naron, bug-os silang nakahukom nga manglangyaw ug adto na manimuyo sa Estados Unidos.
Si Vilma nagserbisyo isip usa ka nurse sa inilang hospital sa Florida, Orlando samtang si Edward, anaa sa departamento sa laing tambalanan diin siya nadestino sa mga supplies sa mga hospital.
Taliwala ning giatubang nga krisis ug dakong hulga sa tibuok kalibutan karon nga mao ning pagkatap sa makalilisang nga coronavirus, ang tibuok kabanayng Naron nagsilbing frontliners. Kini sanglit pulos usab mga nurse ang ilang duha ka mga anak nga sila si Camille ug Ed.
Giangkon ni Edward ang kahadlok sa ilang sitwasyon, apan wala kini mahimong babag sa ilang responsabilidad nga mao ang pagpakigkombati batok sa virus nga mikalas na og libo-an ka mga kinabuhi, ilabi na didto sa Amerika.
"Naa gyud nang kahadlok labi na karon nga nagkadaghan ang kaso dire sa among hospital. Kami ni misis buntagon amo work, ang among mga anak sa pang-gabii," lisod gyud ang sitwasyon karon diri," matod sa 51-anyos nga igsuon sa kanhi PBA player usab nga si Peter.
"Wa gyud sab mi kompiyansa. Sakto gyud mi sa gear inig padung namo sa trabaho, unya pag-uli namo hubo-on ang among gear before mi mosulod sa bay. Mag spray mi og disinfectant apil ang sapatos ug maligo dayon," sumpay ni Edward. "Social distancing pud, unya gamit gyud mi gloves ug mask kanunay."
Sa kasamtangan, doble-kayod ang ilang gihimo, apan siya sayod ug dako ang pagtuo nga inubanan sa hugot nga pag-ampo sa Kahitas-an, kining tanan adunay katapusan.
"Ang virus naay 14 days nga intubation, mabuhi lang na siya ug makabalhin sa laing tawo, hoping nga mahuman na ni, God bless," panapos nga mensahe ni Edward sa online interview sa Superbalita-Cebu.
Gawas ni Peter, si Edward adunay laing igsuon nga lalaki nga atoa sa New York nagbasehan samtang laing babaye nga anaa sa Las Vegas.
Ang ilang mga ginikanan nga sila si Atty. Pedro Naron, kanhi player usab sa University of Southern Philippines (USP) ug Leonor Naron, supervisor sa Department of Environment and National Resources (DENR), pulos na mitaliwan sa laing kalibutan. (JBM)