MAS sayon ang pagbantay sa kapulisan karon sa Central Visayas sa pagtimaan sa Semana Santa kay wa nay mga panagtapok alang sa relihiyusong mga kalihukan tungod sa enhanced community quarantine (ECQ).
Matod ni Police Brigadier General Albert Ignatius Ferro, director sa Police Regional Office (PRO) Central Visayas, nga kasagaran sa mga relihiyusong mga kalihukan sa simbahan naa na sa online.
Gipahibawo sila ni Cebu Archbishop Jose Palma nga ang tanang miyembro sa simbahang Katoliko naa lang sa balay tungod kay nagpadayon pa ang ECQ.
Apan bisan pa niini, nimando gihapon si Ferro sa iyang mga sakop ilabi na sa mga quarantine checkpoint nga bantayan nga way makagawasgawas sa ilang balay gawas lang niadtong dunay paliton.
Ang Huwebes Santo ug Biyernes Santo puro holiday busa way trabaho.
Iyang giawhag ni Ferro ang publiko nga magpuyo lang una sa ilang tagsa-tagsa ka mga balay aron di mosamot ang problema tungod sa coronavirus disease (Covid-19).
Lakip sa iyang panawagan nga diha lang sa sulod sa balay maghimo sa ilang relihiyosong kalihukan sama sa pag-ampo sa Labaw nga Makagagahom ug handumon ang kamatayon ni Ginuong Hesu Kristo sa krus.
“Ako gani diri sa akong quarters naga rosary mi sa kada gabii. So, if they will pray, they could also pray in their own homes,” matod ni Ferro.
Niadto pang miaging semana ang PRO Central Visayas nipatuman na sa Oplan Summer Vacation diin kadtong mga dapit nga suroyanan sa mga bisita bantayan.
Apan ning panahon sa quarantine, wa pay gitugotan nga magtapok-tapok nga bisan ang mga tourist destination kasamtangang gisirado sa mga lokal nga kagamhanan. (AYB)