MAKASAYSAYON ang Siete Palabras karong tuiga kay apilan kini sa mga haligi ug sakop sa ubang Kristiyanos nga mga simbahan ug relihiyon.
Sa mao nga relihiyusong kalihukan sa Simbahang Katoliko sa Biyernes Santo, Abril 10, 2020, ipakita ang kahiusahan sa pagtuo pasinunot sa temang “inter-religious dialogue and promoting a harmonious relationship with indigenous people,” matod ni Padre Glenn Guanzon, tsirman sa Cebu Archdiocesan Commission on Worship.
Ang 2020 gideklarar usab sa Catholic Bishops Conference of the Philippines (CBCP) nga Year of Inter-Religious Dialogue and Ecumenism.
Ang unang pulong batbaton nila ni Fr. Roberto Ebisa sa Society of the Divine Word (SVD) ug Pastor Joe Steven Berdin sa United Church of Christ of the Philippines (UCCP).
Magsentro ang ilang pagpamulong sa panagsultihanay sa duha ka mga lider sa managlahing mga simbahang Kristiyanos.
Si Berdin mobatbat usab sa ikaduhang pulong ug pagaubanan ni Bernadita Gucor, in-charge sa inter-religious dialogue sa Focolare Movement Cebu, organisasyong Katoliko.
Magtutok ang ilang mga pulong sa pagpahaom ug pagsinabtanay.
Gitahasan sa pagpamalandong sa ikatulong pulong sila si Sister Mildred Soldevilla, sakop sa Sisters of the Presentation of the Blessed Virgin Mary (PBVM) ug ni Venerva Amil, sakop sa Badjao community sa Sugbo nga nahimo nang mangtutudlo. Usa sa mga nitabang si Soldevilla arong makalampos ug makaeskwela si Amil.
Ilang pagahisgutan ang kinabuhi sa mga lumad.
Mobatbat ug mamalandong sa ikaupat nga pulong sila si manlalaban Riza Osorio ug Humaida Jumalon.
Si Osario usa ka environmental lawyer ug managing trustee sa Philippine Earth Justice Center Inc. (PEJC) samtang si Jumalon chairman sa local spiritual assembly sa Bahaí, usa ka international nga relihiyon nga dunay simbahan dinhi sa Sugbo.
Ilang pagahisgutan ang mahitungod sa kalikupan.
Ang ikalimang pulong pamalandungan nila ni Sister Maria Gina Gorre, mother general sa Franciscan Sisters Pro-Infante Et Familia sa Siyudad sa Sugbo ug ni Shanadz Burga, usa ka Muslim nga gisagop ni Gorre.
Ilang hisgutan ang pamilya taliwa sa managlahing mga relihiyon.
Ang ikaunom nga pulong maghisgot sa pamilya.
Ang pamilyang Sameco mao ang mamulong. Ang pamilyang Sameco mao ang nagtukod sa Fazenda de Esperansa Philippines, usa ka foundation alang sa mga drug addict.
Si Auxiliary Bishop Midyphil Billones ang mamalandong sa ikapito ug pinakauwahing pulong.
Motapos sa Siete Palabras si Cebu Archbishop Jose Palma, kinsa mohatag sa iyang bendisyon.
Ang Siete Palabras i-brodkast sa radyo, telebisyon ug mga livestream sa Facebook page sa Cebu Metropolitan Cathedral.
Kini ang unang Siete Palabras nga walay mga dagkong kongregasyon nga moapil human gisuspenso ang mga aktibidad sa Semana Santa tungod sa hulga sa Covid-19 ug sa padayon nga enhance community quarantine. (JCT)