HINGPIT nang gi-turn over sa Land Transportation Office (LTO)-Central Visayas ang Malasakit Lounge ngato sa Cebu City Medical Center aron magamit isip temporaryo nga quarters sa mga medical staff niini.
Samtang nagsugod na usab ang Malasakit Bus nga gipakatap nga free bus ride sa LTO-Central Visayas alang sa mga medical staff sa susamang tambalanan.
Pinaagi sa Memorandum of Agreement (MOA) tali sa CCMC ug LTO-Central Visayas, mamahimo nang magamit sa mga medical staff sa maong tambalanan ang Malasakit Lounge ug ang Duterte People's Hall sa N. Bacalso Office niini sa Dakbayan sa Sugbo.
Sila si LTO-Central Visayas Regional Director Victor Emmanuel Caindec ug CCMC Hospital Administrator Ma. Yvonne Feliciano mipirma sa maong MOA, Miyerkules, Abril 8.
Nakadesider ang LTO nga magamit sa mga medical staff sa CCMC ang duha ka dapit sa LTO-Central Visayas subay niining suspensyon sa mass transportation tungod sa Enhanced Community Quarantine nga gipatuman sa Dakbayan sa Sugbo ug probinsiya sa Sugbo.
Ubos sa MOA, mamahimong magamit ang Malasakit Lounge ug Duterte People's Hall sa mga doktor ug nurses sa CCMC sa limitado nga oras nga nalista subay na usab sa lista nga isumiter sa CCMC ug ID sa personnel niini.
Kinahanglan usab nga aduna’y record o log book ang hospital sa mogamit sa pasilidad sa LTO, ug sa matag sulod sa medical personnel sa maong Malasakit Lounge ug sleeping quarter, gikinahanglan nga magsul-ob og ID kon anaa sulod sa LTO facility.
Gawas nga airconditioned ang Duterte People's Hall sa second floor, nga mamahimong maka-accomodate og 12 ka tawo subay sa 12 ka higdaanan niini, aduna usa’y kaligoan ug ilisanan sa maong quarters.
Ang Malasakit Lounge mao ang mamahimong waiting area.
Aron masiguro nga luwas ang medical staff batok Covid-19, aduna’y foot bath ug body disinfection sa pagsulod sa maong pasilidad.
Abli kini alang sa medical staff sa CCMC 24/7.
Samtang nagsugod na pagbiyahe ang Malasakit Bus sa LTO-Central Visayas alang sa medical workers nga manukad kini sa LTO-Central Visayas N. Bacalso Office paingon sa Starmall sa Talisay ug Pacific Mall sa Mandaue.
Duha ka bus ang gipakatap ni Caindec. (HBL)