4 nga mangape, napriso sa paglapas sa ECQ

UPAT ka mga lumolupyo sa Barangay Sambag 2, Dakbayan sa Sugbo nadakpan sa ilang paglapas sa Executive Order (EO) 65 ni Mayor Edgardo Labella nga nagpatuman sa enhanced community quarantine (ECQ).

Duha kanila nadakpan na sa miaging semana ug gipahimangnoan nga sa sunod, prisuhon na sila.

Sila si John Lord Junio, 21, taga Sityo Maharlika; Aldrin James Alueta, 20, taga sityo Mansanitas; Jayhan Duglas, 18, taga sityo Kawayan; ug Jill Tapayan, 19, nadakpan samtang nanaglakaw sa karsada nga way dalang ECQ pass.

Duha kanila nadakpan na sa miaging semana.

Matod ni Police Master Sgt. Jeptah Jumawan, nga ang upat nakalapas sa Republic Act 11132 kun Mandatory Reporting of Notifiable Disease and Health Events of Public Health Concern Act nga may kalambigitan sa EO 65 sa ECQ ni Labella.

Matod ni Jumawan nga ang upat gidakop sa mga barangay tanod nga gipangulohan ni Marlon Zapatalo.

Si Jumawan niingon nga ang upat nakalapas sa EO 65 samtang naglaroylaroy taliwa sa gipatuman nga ECQ tungod sa hulga sa coronavirus disease (Covid-19).

Ang duha ka mga babaye nangatarungan nga nanggawas silang sa ilang pinuy-anan aron unta mangape.

Si Sambag 2 Barangay Captain Ryan Aznar daan nang nipahimangno sa miaging semana nga kinsa kadtong subli nga madakpan adto na prisuhon sa bilanggoan sa police station.

Tuod man, ang upat naa gitanggong sa Abellana Police Station alang sa pagpasaka na sa tukmang kaso./BBT