NIABOT na si kanhi Second Lieutenant Vince Magbanua sa Philippine Army nga gisulod sa urna human gi-cremate didto sa Tactical Operations Wing Eastern Mindanao (EastMin) Ramp, Davao Air Station, Barangay Sasa, Davao City niadtong Biyernes, Abril 10, 2020, sakay sa C-295 aircraft sa Philippine Air Force.

Si Second Lieutenant Vico Magbanua, kambal nga igsuon ni kanhi Lieutenant Vince, maoy niuban sa gi-cremate nga lawas sa igsuon gikan sa Maynila. Iyang gitunol ang urna (urn) ngadto sa iyang mga ginikanan kinsa naghuwat didto sa military flight ramp.

Usa ka simple nga pagbendisyon ang gihimo ni Lieutenant Peter A. Esarza, district chaplain sa Coast Guard District Southern Mindanao.

Human niini, gihimo ang katapusang pagsaludo sa “men and women” sa TOW EastMin gipangulohan sa ilang wing commander Colonel Dennis Estrella uban sa mga opisyal sa Eastern Mindanao Command.

Istrikto gihapong gipatuman ang physical distancing protocols ug uban pang mga disinfection nga paagi sa tibuok kalihukan ni Lieutenant Colonel Florante Baterina, Group Commander sa TOG-Davao Region.

Si Second Lieutenant Vince, taga dakbayan sa Davao ug miyembro sa Philippine Military Academy (PMA) Class 2018. Siya maoy platoon leader/executive officer of the Weapons Company, Headquarters Service Battalion, 48th Infantry Battalion, Seventh Infantry Division nga nagbase sa Doña Remedios Trinidad, Bulacan.

Gisaludohan si Second Lieutenant Vince Magbanua sa paghalad sa iyang kinabuhi sa pagserbisyo ug kaisog aron nga mahatud ang mga tabang sa gobyerno ngadto sa mga naapektuhan sa enhanced community quarantine bisan pa sa kapeligro sa tahas.

Sumala sa iyang igsuong kambal, di niya malimtan ang paboritong linya nga kanunay’ng madungog gikan ni Second Lieutenant Vince bisan niadtong naglisud nag gutlo sa iyang batan-ong kinabuhi, “Stay Alive! I love you all!”

Gipadangat sa TOW EastMin ang ilang kinasingkasing nga pahisubo ngadto sa nagbangotan nga pamilya ug kabanay ni Second Lieutenant Vince Magbanua.

Kahinumdoman nga niadtong Abril 7, si Second Lieutenant Vince nakasinati og kalisud sa pagginhawa uban sa gahi nga ubo busa gidali paghatud ngadto sa Norzagaray Municipal Hospital gamit ang ambulansiya sa militar.

Gitambagan siya sa nag-atiman nga doktor nga mopailawom og 14-adlaw nga quarantine sa ilang headquarter human madayagnos nga adunay Acute Bronchitis.

Niadtong Abril 8, mga alas 3:45 sa hapon, subling gidali paghatud ang sundalo ngadto sa Norzagaray Municipal Hospital tungod kay naglisud na sab og ginhawa. Apan gideklara nga dead on arrival sa nag-atiman nga doktor.

Ang espesimen ni Magbanua gihatud ngadto sa Bulacan Provincial Health Office ug sa Research Institute of Tropical Medicine sa Manila alang sa pagsuta kung natakdan ba kini sa coronavirus disease (Covid-19). (PR)