GIKAN sa Wuhan sa nasud China hangtud na sa tibuok kalibutan kining makahahadlok nga sakit nga mipatay na og dul-an sa usa ka gatos kalibo ka mga tawo sa tanang nasud sa atong kalibutan.
Ang pinaka-ngilngig ang nahitabo didto sa State of Washington ug mga kasikbit nga estado sa United States of America kay sulod lang sa 24-oras, mikabat sa 2,803 ka mga tawo ang namatay gumikan niining maong virus.
Sa nasud sa China kung diin didto nagsugod kining mananakod nga sakit, ang ilang kuta hangtud karon, anaa lang sa 3,878 ambot lang kaha og wala ba’y gililong, pero sa adlaw-adlaw nga balita, diha ra kutob ang gidaghanon sa ilang mga patay.
Karong panahona nag-contest sa gidaghanon og mga patay ang tulo ka nasud, nag-una pa gihapon ang Italy nga mitala na ngadto sa 18,349 gisundan sa Espanya, nga adunay 16,177 ug America nga mukapin sa 14,000 hangtud karong panahona.
Ang Covid-19, upat ka bulan hangtud karon, Marso palang nakasuld sa atong nasud sa Pilipinas nga mitala na og 247 ka tawo ang namatay, hangtud karon, ang pangutana, pila kaha ang kuta sa mga Pilipino nga mamatay niining sakita? Sama sa ubang mga nasud nga nag-anam pa og saka ang nangamatay kada adlaw.
Mao nga hangyo sa atong mga igsuong Pilipino nga dili magmagahi sa ulo, kung unsay mga balaod nga gi-implementar sa atong gobyerno, tumanon ta, kay kung dili ka mutuman, aw, basig anaa ka sa kuta nga maapil sa pagkamatay niining sakita bag-o kini mawala.
Kasagaran sa mga demonyong mga tawo nia sa mga Pilipino, diman hinuon tanan pero ang mga demonyong politiko nga anaa sa oposisyon wa’y laing gihimo naglurat ang mga mata og tan-aw sa mga panghitabo, ug ang gibantayan mao ang atong Presidente nga kuno, walay nahimo, bisan kon namayat na pag-ayo si Presidente Duterte kung unsaon pagsulbad kining problemaha, sa usa ka kaaway nga dili makita.
Sumala pa sa atong Presidente, kung kanus-a mawala ang Covid-19, mokabat pa sa duha ka tuig nga walay mga infrastructure project ang Pilipinas tungod kay ang budget para niini, maoy gigamit sa atong pangulo para ipamalit og mga rasyon sa atong mga kaigsuonan nga kadaghanan nawad-an og trabaho.
Sa mga baga og nawong nga mga politiko nga anaa sa administrasyon, ug naa pamo’y gamay nga ka-ulaw nga nagpabilin, ayaw sakyi og politika ang kuwarta sa gobyerno, ihatag diretso ngadto sa mga tawo.
Kitang tanan puro apektado niining maong katalagman, unta walay magpahimulos nga politiko sa kuwarta nga gisalig sa atong nasudnong gobyerno ngadto sa mga local government units (LGUs).