ADUNAY pinasahi nga pakontes ang lungsod sa Monkayo sa katawhan sa lungsod nga ning kasamtangan ang sagad ginakaon mao ang sardinas ug noodles sanglit maoy ginahatag nga hinabang pagkaon sa gobyerno isip ayuda sa katawhan samtang gipatuman ang enhanced community quarantine (ECQ).
Sa opisyal Facebook page sa LGU Monkayo, giawhag ang tanang molupyo sa lungsod nga mosalmot sa maong pakontes nga gitawag og "Best Sardines/Instant Noodles Original Recipe Contest" nga diin adunay gitaganang dakong kantidad isip pa-premyo sa mamahimong mananaug.
Gikabutyag nga ang kriterya sa pagsalmot una, nga i-like ang opisyal Facebook page sa local government unit sa lungsod sa Monkayo ug i-share ang post sa maong pakontes.
Ikaduha, magpili kung unsa ang “main ingredient” sa mahimong recipe nga lutuon kung sardinas ba o instant noodles o kombinasyon sa duha. Ikatulo, i-upload ang maong recipe sa kaugalingong Facebook account, lakip ang mga listahan sa mga sagol ug ang pamaagi sa pagluto nga may kalakip nga mga litrato dayon piktyuran ang mga sagol ug ang proseso sa pagluto.
Gipahimangnoan ang mga sumasalmot nga sa pag-post sa entry dili kalimtan ang pagbutang sa #MonkayoStayAtHome ug i-tag sa @localGovernmentUnitofMonkayo.
Matud pa nga ang tulo sa mga adunay pinakadaghang share maoy mamahimong Top 3 finalist ug sila i-rate base sa originality ug innovativeness sa maong recipe ug pilian kung si kinsa ang mudaog pinaagi sa mga piniling mga hukom.
Sumala pa nga nagkantidad og P3,000 ang ganti sa unang mananaug, P2,000 usab sa ikaduhang mananaug ug P1,000 sa ikatulong mananaug.
Sponsor sa maong pakontes ang Mayor sa lungsod, Mayor Ramil Lao Gentugaya ug ang kapikas niini sa kinabuhi nga si Vice Mayor Joanna Gentugaya.
Karong Abril 17, 2020 ang deadline sa maong pakontes ug ang mahimong mananaug ipahibalo sa petsa 18 sa bulan sa Abril ning kasamtangang tuig.
Daghan sa mga lungsuranon ang buot mosalmot sa maong pakontes ug malaumon nga sila modaug sanglit, dako ang ikatabang sa kuwarta nga madag-an labi na ning panahon sa krisis nga gisagubang gumikan sa Covid-19.