ILUSAD sa Land Transportation Office (LTO) 7 ang Buntis Sakay Program sugod karon, Martes, Abril 14, kini aron hatagan og libreng kasakyan ang mga mabdos human walay pampubliko nga transportasyon ang gitugotan subay sa Enhanced Community Quarantine (ECQ).
Tanang mabdos nga kinahanglan moadto sa St. Anthony Mother and Child Hospital (F. Gabuya St., Basak San Nicolas), Vicente Sotto Memorial Medical Center and Cebu Maternity Hospital, (B. Rodriguez St.), Visayas Community Medical Center (Osmena Blvd.), St. Vincent Hospital (Osmena Blvd.), ug Cebu City Medical Center mamahimong maka-avail niini.
Lunes hangtod Sabado, usa ka kuyog ra ang mamahimo sa matag mabdos.
Magsugod ang rota sa bus gikan sa Starmall Talisay sa alas 8:00 sa buntag ug alas 2:00 sa hapon. Mamahimong mo-para ang mga inahan sa agian sa bus sa Citi Hardware Bulacao, Mandaue Foam Pardo, Holy Cross Parish Church Basak Pardo, World Wide Home Depot N. Bacalso Ave., ug Shell Gasoline Station V. Rama Ave.
Ang pabalik nga rota kay alas 11:00 sa buntag ug alas 4:00 sa hapon diin manukad kini sa CCMC. Susama ang agian niini pabalik sa Starmall Talisay.
Matod ni LTO 7 regional director Victor Caindec nga daghan ang mabdos nga nangreklamo nga dili makabisita sa mga tambalanan tungod sa “No Backride Policy” nga gipatuman nila karon sa mga motorsiklo.
Ang maong pribado nga coaster mamahimo kining makaakomodar og 12 ka buntis subay na usab sa social distancing guidelines sa Department of Transportation. (HBL)