Compio: Sa akong laag sa Hong Kong

Compio: Sa akong laag sa Hong Kong

BISAN asa nga suok sa kalibutan karong mga panahona gihisgutan ang coronavirus disease (Covid-19) nga nagsumikad sa Wuhan, nasud China, diin mokabat na sa 1.5 milyon ka mga tawo ang natakbuyan niini ug linibo ang nangamatay labi na sa Estados Unidos.

Nalab-as lang sa akong hunahuna ning mga taknaa ang akong paglaag-laag sa Hong Kong, ang administrative region sa nasud China, daw anaa sa gatus kilometros, mao na ang Macau, parte sa Mainland China diin niadtong mga taknaa, hinapos nga semana sa Enero mao ang pagkusog sa pagtaas sa ihap sa natakbuyan sa maong virus.

Pag-abot palang namo sa Hong Kong International Airport, dili basta-basta ang mga thermal scanners, hightech kaayo nga technology nga misugat kanamo pagnaug sa eroplano gikan sa Ilo-ilo International Airport.

Kampante kaayo ko, dala ang kabalaka ug kahadlok nga basin unya sa sentro nga bahin sa Hong Kong apektado na sab, apan nasayop ko, gumikan gi-sirado naman sab diay sa Hong Kong ang agianan by-land gikan China ug gi-ban na sab ang pagtugpa sa mga eroplano gikan sa maong nasud ngadto sa Hong Kong.

Naka-face mask ang tanan sa Hong Kong, ug nanindog akong balahibo sa akong nakita nga daw mora og salida nga gitakbuyan ang nasud sa maong sakit, ug daw sama sa zombie nga salida ug Trip to Busan diha sa among pagsakay og train.

Kini lagi nga turista ta nianang mga higayona, laag ang naa sa hunahuna, gilibot namo ang mga dapit sa Hong Kong diin asa daghan sab ang mga turista gikan sa nagkadaiyang dapit sa kalibutan.

Pag-uli sa among gi-rentahan nga kuwarto sa usa ka hostel sa Tsim Sha Tsui (TST), ethyl alcohol 70 percent solution dayon akong gipangita sa akong bag, gikan sa pagkaligo dayon matulog.

Siyempre matag tunga sa adlaw ko nag-ilis og face mask ug gainom og vitamins, ug mikaon og mga masustansya nga pagkaon, ang resulta, lig-on ang panglawas. Wala gyud nako nabati ang kakapoy, sip-on, labad sa ulo, ubo, hilanat ug pangpangluya, -- kini ang resulta sa pag-amping sa lawas aron dili matakbuyan og bisan unsang sakit.

Labaw sa tanan, ang pagsampit sa Labaw nga Makagagahom ang gikinahanglan, Siya ang makagiya kanato kanunay, dili ta Niya pasagdan kung tim-os gayod ang atong pagtuo diha Kaniya. Ihatag ug ubanan Niya kita, higala.

Kapauli nako gikan sa Hong Kong mga higala, diin mibilib gayod ako sa mga lihok karon nga gihimo sa Bureau of Quarantine sa Department of Health (DoH) sa atong mga airport, labi na sa among pagtugpa sa Mactan Cebu International Airport sakay sa Cebu Pacific 5J237, niadtong Enero 29.

Mag-amping ug mag-ampo kita mga Dabawenyo nga unta matapos na kining tanan, sama sa nahitabo karon sa Wuhan, China nahuman na sila sa ilang 77-diyas nga lockdown. Unta makab-ot na sab nato kini sa dili madugay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph