SA NILABAYNG Semana Santa, wa tuyoang nigawas sa akong wall ang video ni Maestro Dennis Sugarol nga tugob sa pagbati nga nikanta sa “You Raise Me Up” ni Josh Groban.
Paglabay sa pila ka oras nag-post sad ang Cebuano vocalist sa On The Cover band nga si Junnie Tampos sa iyang version sa kantang “Who Am I” sa Casting Crowns.
Nindot kaayo paminawon ang ilang mga awit ning panahon nga nagkinahanglan ta og pangpakalma gikan sa grabeng stress nga atong nasinati.
Mao lang ni hunahunaa nga naglisud man gani ang mga adunahang nasud, kita pa kaha nga daghan kaayong buaya sa atong gobyerno. Sakto no!?
Covid Update
Nahinabi nako sa Superbalita online ang higala nakong Pinay nga nagtrabaho isip medical assistant sa Tokyo. Sa Japan wala kuno silay lockdown ug wala sad silay curfew. Pero sirado ang ilang mga dagkong kompanya.
Matod usab sa laing Pinay nga tua sa Germany wala silay curfew pero naa silay lockdown nga matapos sa Abril 19.
Nagka-chat sad mi sa Sinulog Festival composer nga si Dandin Ranillo nga parehong frontliner karon sa iyang asawa isip mga nurse sa dakong ospital sa Amerika.
Matod ni Ranillo nga daghan sa mga staff sa ubang nursing facilities sa California ang wala na mamalik tungod sa kahadlok ug kakapoy.
Mao nang kita dinhi bisan kon malibkas na ni atong enhanced community quarantine dapat padayon gihapon ang travel ban. Sakto si Gov. Di gyud ta mokumpiyansa.
Helicopter
Wala madayon ang “blessing from the sky” ni Father Renel Dom Renelius niadtong Easter Sunday.
Andam na unta ang sakyan nilang helicopter nga maoy gamiton nila sa pagbendisyon sa Sugbo.
Apan tungod sa mga kakulian matod ni Ms. Aida Patana ila ning giisbog sa sunod Dominggo, 10 a.m., Abril 19.
Atangi ni ninyo ug dungan tang mangaliya nga matapos na ning maong krisis aron mabalik na sa normal ang atong kinabuhi.
Way tawo
Kaluoy sa Ginoo niadtong Dominggo sa Pagkabanhaw mingaw gyud ang tanang beach sa Liloan. Wa gyuy nagtikawtikaw.
Sa akong ihap morag di momenus sa 10 ang beach dinhi sa Liloan. Mapuno gyud labi na og weekend tungod sa kadaghang modayo. Salamat sa inyong kooperasyon. Stay at home lang gihapon mga suki. #Amping.