GITUGOTAN na ang kabanayng Nimis nga makahimo sa ilang mga naandang gimbuhaton human nga naka-recover na sa coronavirus disease 2010 (Covid-19) si Engineer Warlito Nimis ug niguwa sab nga negatibo sa swab sample ang iyang misis ug anak.
Si Nimis nga maoy ikaduha sa tulo ka mga pasyente sa dakbayan sa Lapu-Lapu nga nataptan sa Covid-19.
Sa tulo ka mga kaso sa siyudad duha na ang naka-recover ug pabilin pa sa tambalanan ang ikatulong pasyente nga nagpa-alim sa maong balati-an.
Gitug-an ni Grace Mary Carungay, pangulo sa City Epidemiology and Surveillance Unit (CESU) nga niadtong Domingo, Abril 12, gi-pull out na ang mga sakop sa city police office nga nag-cordon sa pinuy-anan sa mga Nimis sud sa Villas Magallanes Subdivision, Barangay Basak.
Nasayran pulos doctor ang asawa ug anak ni Nimis nga nagpa-ubos sa self-quarantine sa ilang balay sud sa duha ka semana, bisan pa man nga negatibo sa virus.
Saysay ni Carunggay nga sa ilang pakighinabi sa pamilya human nasuta nga nagpositibo ang senior citizen nga enhinyero, aduna kiniy gihimong meetings sa publikong lugar ug nakadu-aw sab usa sa mga mall sa silingang dakbayan nga gituohan didto makuha ang kagaw.
Niadtong Marso 22 nasulod sa usa ka pribadong ospital sa Lapu-Lapu si Nimis nga gipatambalan sa severe acute respiratory infection (SARI), samtang nagpaabot pa sa resulta sa iyang swab sample.
Matod pa ni Carunggay sa dihang nahinabi sa Superbalita Cebu nga sa dihang nasuta nga nagpositibo ang maong pasyente sa Covid-19 gibalhin gilayon kini sa Cebu Doctors Hospital, sa dakbayan sa Sugbo.
Niadtong Sabado, Abril 11 sa gabii naka-uli na sa ilang pinuy-anan ang maong pasyente nga gi-welcome sa city government nga gipangulohan ni Mayor Junard Chan ug sa mga sakop sa Crisis Management Team didto sa gangha-an sa naasoyng subdivision.
Gikalipa sa mayor ang maayong balita sa dihang usa nalay nagpabiling positibo sa Covid-19, dungan sa panghinaot nga ma-Covid free na ang Lapu-Lapu.
Samtang ang hepe sa City Disaster Risk Reduction Management Office, Nagiel Bañacia nipasabot nga ang ilang gihimong pag-welcome kabahin sa healing process sa pasyente ingon man ngadto sa sakop sa ilang kabanay ug mga kasilinganan.
Usa kini ka paagi sa "psychological first aid" ngadto sa pasyente ilabi na nga dili kalikayan nga bati-on og kahadlok ang mga tawo diha sa ilang palibot sa higayon nga masayod nga nagpositibo sa makatakod nga Covid-19.
Si Engr. Nimis nga sakay sa iyang sakyanan atol sa iyang pag-abot sa gate sa subdivision ang nahinangop sa gihimo sa local nga kagamhanan ug mipaabot sa iyang pasalamat ni Mayor Chan sa suporta niini.
Kahinunduman nga unang naka-recover si Porferio Daclan ug niadtong miaging semana lang naka-uli na sa iyang balay sa Barangay Babag. (FVQ)