Editoryal: Mosuporta ug motuman

KINTO karon ang tiil sa mga sabungero sa Davao City kay sumala ni Mayor Sara Duterte-Carpio, iyang ipaimbargo ang mga manok kung masikop nga nagpasabong, ug lagmit masinabawan kini ug ma-adobo human sa pagkumpiska.

Nagsumikad ang pamahayag sa mayor dihang nag-trending sa social media ang mga nagsabong-sabong sa Times Beach, Barangay 76-A, Ecoland, Davao City, Dominggo sa hapon, bisan pa nga hugot ang pagpatuman sa Enhanced Community Quarantine (ECQ) ning siyudad.

Mga gahi og ulo kung matawag kining mga kalalakin-an nga nagpasiugda og sabong, labi na nga anaa sa 25 porsiyento sa mga kompermadong natakbuyan og coronavirus disease (Covid-19) sa Mindanao naggikan sa sabungan sa Matina Gallera ning siyudad.

"Og naa mo'y makita nga nag-sabong. Adtoa na ninyo, kuhaa ninyo ang manok, lutoa ninyo ang manok, pagkahuman ingna dayon ninyo, ingon ni Inday Sara lutuon daw namo na inyong manok," sumala ni Mayor Sara atol sa programa niini sa 87.5 FM, Davao City Disaster Radio niadtong Lunes.

Tungod niini, gihingusgan karon sa ginsakpan sa Davao City Police Office (DCPO) ang kampanya sa pagbatok sa pagtapok-tapok labi na sa sabong-sabong aron malikayan ang pagkuyanap sa Covid-19.

Sa naunang mga pamahayag sa DCPO, gibutyag sa spokesperson nga si Police Captain Rosario Aguilar nga di nila palabyon ang mga higayon nga dunay mga tapok sama sa sabong-sabong, hantak, baraha, majhong ug bisan pagtapok atol sa pista.

Lagmit, wala na gayod mosulay og patari og manok sa mga tugkaran, kay nasayod naman ang mga sabungero sa bahad ni Mayor Inday, ug di gyod mag-among-among nga magtapok-tapok sa eskena luyo niining ECQ.

Gusto man kaha ang tanan nga mahuman na kining krisis sa Covid-19, mao nang maningkamot ang tanan nga motabang sa kampanya sa gobyerno; mosuporta ug motuman, -- kini ang labing makatabang sa tanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph