ATONG hisgutan dinhi ang nahitabo sa miaging semana dihang trending sa social media ang usa ka ginang nga niingon nga kulang pa nila ang P8 mil nga ayuda sa gobyerno.
Sa video clip nga miguwa sa telebisyon, giingon sa ginang nga ang maong kantidad igo ra gastuhon nila sa usa ka semana tungod kay walo ka buok ang miyembro sa ilang pamilya.
Ang netizens (apil na dinhi ang mga empleyado ug opisyales sa gobyerno lokal ug nasyunal) akong namatikdan nga ilang gibugal-bugalan ang maong ginang.
Ang uban kanila, dali kaayong nakakompyut sa galastuhan sa maong pamilya, nga tag P47 ang badyet sa kaon sa matag usa.
Ang ilang gikwenta ang pagkaon lang. Nalimtan na ang uban nga panginahanglan sa pamilya sama sa balay, kuryente, tubig, pamilete, ug uban pang panginahanglan sa matag adlaw.
Sa akong nakita, basta duna lang silay matabi sa social media -- ilabi na makasaway og tawo -- okay na kanila.
Di man hinuon tanan tungod kay akong nabasahan ang komento sa akong higala nga cum laude graduate sa kurong Political Science nga si Vanessa AniÒo Salva.
Suma pa niya sa Facebook post niatong Miyerkules Santo: "I can't believe we have fallen to this middle class vs. lower class kind of war. Go get your own idea but stop continuously putting fuel to the fire. You're entitled to your own opinion as much as I do, but it's not good pulling each other down especially during this time.
"Sige mo'g yawyaw nga di mo ganahan og toxic, mas labaw pa diay mo. Okay maski ako dili aprub sa P8k for 1 week, pero ayaw na ninyo na sigeg iduot sa mga kabos.
"Not because someone spoke up for the middle class doesn't mean you have to continue degrading the poorest of the poor. Yes, naay tamad sa ilaha but not everyone. Ayaw gani mo'g palabi sa inyong gibati as if kahibalo gyud mo sa tinuod nga sitwasyon sa mga tao nga below the poverty line gyud.
"PS. Kabalo ta unsay joke pero dagha'g joke ang dili maayo. Kanang inyong mga jokes diha wala mo kabalo gina mind condition na ang uban na mapuno napud og hatred towards those people na inyong sige sawayon."
Sa akong tubag sa iyang Facebook post: "Akoy naluoy sa pobreng interviewee nga subject sa mga pagsaway sa mga tawo (ilabi na sa mga government employees nga duol sa grasya sa local and national government) nga wala nakabalo ug nakasabot sa kahimtang sa mga sama namo nga pobre, ilabi na gyud sa giinterbyu nga 4Ps beneficiary nga posible nakuyawan o nalibog pag-distinguish unsa ang week o month dihang giinterbyu sa media. Hinaut nga pasayluon sila sa Kahitas-an sa ilang gihimo."
Taas ang among kulukabildo, apan di na nako iapil dinhi sanglit ang akong tuyo mao ang pagpanawagan sa tanan nga di nato iduot og samot ang pobre, kay sulikwaot nga sige kita og panawagan nga nga maghiusa kontra Covid-19, apan kita ra gihapon ang nagduot nga magkabahin-bahin ang mga Pinoy.