DAKO kaayo og problema ang giatubang sa tibuok kalibotan karon gumikan sa nagpadayong hulga sa Covid-19.
Gipaubos sa quarantine ang katawhan tungod sa lockdown. Daghan ang nagutman tungod sa kakuwang sa supply sa pagkaon.
Gani miabot na karon og 114,312 ang nangamatay sa tibuok kalibotan ug dunay na-infected nga 1,856,831 ka mga tawo.
Mas bintaha hinuon kita dinhi sa Pilipinas kay duna pay gobyerno nga mipakaon sa mga tawo nga gipanggutom ug di daghan ang namatay.
Di sama sa nasud sa Bangladesh makaluluoy ang katawhan kay wanay gikon gumikan sa problema sa ilang gobyerno.
Dinhi sa ato mga asyuso pa ang ubang mga tawo kay masuko nga gi-tagaan ug bugas gikan sa National Food Authority (NFA) rice.
Sama sa Boljoon, dunay mga tawo nga nagbugalbugal sa gobyerno nga nanghatag og NFA rice. Apan kinasing kasing nga gidawat ang dakong grasya.
Sa gihimong pagpanukiduki sa Mata sa Agila nabulgar nga ang nagpakalat sa fake news nga di maayong klasi sa bugas ang kontra sa pulitika ni Boljoon Mayor Merlou Derama.
Sa akong interview ni Derama, iyang gitubag ang pagpalit og NFA rice alang sa mga tawo nga apektado sa Covid-19.
Kini aron mapa-igo ang budget nga gigahin sa ilang lungsod aron Makaka-on ang tanang tawo maoy pamahayag sa mayor.
Gidugang ni Derama, nga dili nila sayop kon dunay nasagol nga dili maayo ug klasi. Samtang ang NFA rice maoy gipamalit sa mga mayor sa probensya sa Sugbo.
Kinsa may mayor nga gustong maisyu tungod sa bugas? Kini maoy pangutana sa mayor ngadto sa iyang kritiko nga kontra sa pulitika.
Nagpaubos ang mayor pinaagi sa pag-ingon nga panahon karon sa pagtibangay, maghiusa ug isalikway ang pulitika kay nag-atubang ug dakong krisis ang kalibotan.
Para nako nindot ang punto sa mayor. Di karon ang panahon sa pamulitika. Og sa pagpanaway niining mga klasi sa tawo nakatabang ba sila sa katawhan nga naglisud sa panginabuhi karong panahuna? Email: efrenlonzon71@gmail.como text: 09235562777