HUMAN mabantayi sa kapulisan nga nanaghan og balik ang mga sakyanan nga nanagan sa kadalanan, nahukman sa Cebu City Police Office (CCPO) nga mopahigayon og dungan nga mga checkpoint sa nagkadaiyang mga dapit sa Dakbayan sa Sugbo.
Tuyo niini mao ang pagpatuman sa kamandoan sa general headquarters sa Philippine National Police (PNP) nga hugtan ang pagpatuman sa enhanced community quarantine (ECQ).
Sa interview kang Police Col. Josefino Ligan, officer-in-charge sa CCPO, siya nipasabot nga gikinahanglan ang estriktong pagpatuman sa kapulisan kon kinsa lang ang angay nga mogawas sa ilang balay panamalay o gitawag og authorized person outside residence (APOR).
Sa checkpoint, way gipalabay, four-wheeled nga mga sakyanan ug mga motorsiklo, gipangpara ug gipangitaan og ECQ pass ug mga dokumento ang mga sakay.
Dugang pa ni Ligan nga gawas sa pagpangutana kon asa sila padulong, gipangitaan usab sila sa kapulisan og ECQ pass.
Ila usab nga gisuta kon naka face mask ba ang mga sakay.
Kauban sa kapulisan ang mga sakop sa Cebu City Transportation Office (CCTO) ang pag-man sa mga checkpoint aron way makalusot.
"Gipang isyuhan sila og TOP gikan sa atong mga personnel sa TPG (Traffic Patrol Group) ug CCTO kay ang CCTO kay maka isyu man ug TOP. Sagad sa atong nabantayan nga mga violatons, walay mga tsinelas, walay mga napakita nga dukomento, dili APOR," dugang ni Ligan.
Samtang naobserbahan usab ni Ligan nga sukad niadtong Lunes, Abril 13, nagkadaghan na ang mga sakyanan nga nanggawas sa kadalanan
"Abi siguro nila nga tungod kay humana ang Semana Santa, makagawas gawas na sila," matod ni Ligan.
Anaa na sa ika upat ka semana sa pagpatuman sa ECQ.
Nahukman ni Ligan nga kada adlaw na buhaton ang checkpoint aron mabadlong na ang magsige og gawas sa balay bisan taliwa sa pagpatuman sa ECQ ug 24 oras nga curfew sa ma menor ug senior citizens nga nagpangedaron og 65 anyos pataas.
Nadakpan
Moabot og 190 ka mga tawo ang nadakpan nga way ECQ pass; 481 naisyuhan og traffic citation ticket (TCT), 13 na isyuhan og TOP; 68 ka mga motorsiklo ang na-impound usa ka tricycle ug upat ka four-wheeled kay walay rehistro.
Si Santa Cruz Barangay Captain Jerome Arevalo kinsa anaa usab sa checkpoint sa Osmena boulevard, niingon nga duna untay color coding ug itakda nga oras ang pagtugot sa mga dunay ECQ sa paggawas.
Matod niya nga ingon sa giabusahan ang ECQ.
"Halos bisan asa na lang mag lakawlakaw ni sila ang mga naay ECQ pass tungod kay naay ECQ pass. Bisan asa na lang sila mopaingon," butyag ni Arevalo. (BBT, AYB)