NAGLARAW karon ang Davao del Sur Electric Cooperative (Dasureco) nga mo-angkat og kuryente gikan sa dakong kumpaniya nga Hydro Electric Power Corporation (Hedcor) nga gipanag-iyahan sa pamilyang Aboitiz.
Giangkon ni Dasureco General Manager Engr. Jesus Dela Victoria, dinhi sa Sun. Star Superbalita, nga kini ang usa sa ilang plano aron mahatagan og solusyon ang 5 ka oras nga rotating brown-out dinhi sa lalawigan.
Si Dela Victoria, nagkanayon nga ilang hangyuon ang Hedcor nga mogahin sab og power supply ngadto kanila sanglit taas ra kaayo ang oras sa pagpawong sa kuryente nga gimando sa National Grid Corporation of the Philippines (NGCP).
Apan, matod niya, wa kini nagpasabot nga wa na gyuy mahitabong brown-out sa probinsya.
"Imposible gihapon na kay kung dili gyud moulan hangtod sa bulan sa Hunyo, medyo delikado gyud," niya pa.
Aminado kini nga nalugi na ang ilang kumpanya tungod sa kada adlaw nga brown-out.
Gikatahong nagsugod na sa ilang operasyon ang Hedcor lamang kay giingon nga 26 megawatts pa lamang ang gipaguwa niini.
Apan naglaum si Dela Victoria nga magkasinabot sila sa ilang tumong.
Gitakdang makigtagbo ang tigdumala sa Dasureco ngadto sa kadagkuan sa Hedcor aron maduso ang maong plano.
Sa kasamtangan, nagpabiling nag-agwanta ang Dasureco sa ilang power supplier nga mao ang NGCP.
Ang NGCP padayon sab nga ni-implementar sa tag-as nga oras sa pagpalong sa elektrisidad dinhi sa isla sa Mindanao sanglit ubos gihapon ang supply sa kuryente nga ilang makuha pinaagi sa tubig gumikan sa nasinating El Ni¤o phenomenon. (Orlando B. Dinoy)