USA ka ulitawo ang gipusil samtang naglakaw pauli sa ilang balay sa alas 2:20 sa kaadlawon kagahapon didto sa Purok San Vicente, Barangay 21-C Poblacion, siyudad sa Davao.

Ang biktima mao si Bernie Garcia, 18, construction worker, nagpuyo sa Blk. 50, Barangay 21-C Poblacion samtang ang suspetsado nailhan lang sa pangalan nga alyas Waray, hamtong ang pangidaron, nagpuyo sa Isla Verde, Barangay 23-C Poblacion.

Base sa imbestigasyon sa Sta. Ana Police Station, ang biktima naglakaw paingon sa ilang balay apan giatangan siya sa grupo ni alyas Waray nga nagbitbit og wala matino nga kalibre sa armas.

Giingon nga dihang duol na ang biktima gipusil kini sa makadaghan nga higayon apan nadagan siya mao nga naigo lang ang iyang walang tuhod.

Si Garcia daling gidala sa Davao Medical Center (DMC) samtang ang suspetsado kauban ang iyang grupo daling misibat paingon sa wala masayri nga lugar.

Sa laing bahin, usa ka ulitawo ang midangat sa DMC human siya gidunggab sa iyang kainom sa alas 3:30 sa kaadlawon kagahapon didto sa Gotamco, Barangay Leon Garcia.

Ang biktima mao si Redin Patindis, 18, walay trabaho, nagpuyo sa Purok Sto. Ni¤o, Barangay Kapitan Tomas Monteverde samtang ang suspetsado mao si alyas Daniel, hamtong ang pangidaron, nagpuyo sa Soliman, Barangay Kapitan Tomas Monteverde.

Ang biktima ug suspetsado giingon nga nag-inom niadtong higayona apan nagkalalis mao nga nahitabo ang pagpanunggab hinungdan nga nakaangkon og duha ka samad sa kalawasan ang biktima.

Gipangita na karon sa kapulisan ang mga suspetsado aron sikopon ug pasakaan og kaso tungod sa ilang sala nga nahimo. (AD)