USA ka taas nga opisyal sa kapulisan nga gilambigit sa pagpatay sa 57 ka mga tawo sa Maguindanao Massacre kinsa nakaikyas sa iyang detention cell niadtong miaging bulan, nasikop na pag-usab sa mga otoridad kagahapon dinhi sa siyudad sa Davao.

Si kanhi Maguindanao provincial police director Superintendent Piang Adam gibilanggo sa Sultan Kudarat Provincial Jail gumikan kay gilambigit siya sa pagmasaker sa 57 ka mga biktima didto sa Barangay Salman, Datu Unsay Ampatuan, Maguindanao niadtong Nobyembre 23, 2009.

Mga biktima gimasaker samtang paingon sila sa buhatan sa Commission on Elections (Comelec) sa Shariff Aguak aron mag-file sa certificate of candidacy ni Buluan Vice Mayor Ismael "Toto" Mangudadatu isip governador sa Maguindanao Province.

Si Adam giingon nga nakaikyas gikan sa iyang selda niadtong Pebrero 17 ug kasamtangan nga nagtago sa iyang giabangan nga balay sa Blk. 30, Lot 17, Gulf View Subdivision, Barangay Bago Aplaya, siyudad sa Davao.

Base sa spot report sa Talomo Police Station, si Adam nasikop sa alas 2:30 sa kaadlawon pinaagi sa hiniusang pwersa sa Talomo Police Station inabagan nila Chief Inspector Alexander Rondal sa Regional Intelligence Unit (RIU) 15 sa Maguindanao Province, Chief Inspector Neptali Yordan ug Chief Inspector Ryan Paloma sa RIU 12, ug Superitendent Fernando Ortega sa Special Action Force (SAF).

Nahisgotang mga opisyal miadto sa buhatan ni Chief Inspector Joselito Loriza, hepe sa Talomo Police Station, human sila masayud nga didto sa Gulf View nagtago si Adam.

Dihang miabot ang mga otoridad sa giabangan nga balay ni Adam, nagtinguha pa siya nga moikyas gikan sa kamot sa mga otoridad opinaagi sa pag-ambak sa koral ug mitago sa balay nga gipanag-iyahan ni Nel Avena.

Si Adam wala na makahimo sa pagpalayo sa maong lugar mao nga giposasan siya ug gidala sa Talomo Police Station aron ipatala ang pagkasikop niya. Siya gidala dayon didto sa buhatan sa Regional Police Office (PRO) 11 sa Camp Catitipan.

Pasiunang taho nga nasayran sa Superbalita, mga opisyal sa Sultan Kudarat Provincial Jail naglisod pagpasabot kung giunsa pag-eskapo ni Adam gikan sa iyang selda.

Ang pag-eskapo sa maong opisyal nadiskubrehan lang human nasiplatan sa usa ka jail guard nga naguba na ang padlock sa pultahan sa iyang detention cell.

Giingon nga si Adam ig-agaw ni Provincial Police director Senior Superintendent Suharto Teng Tocao ug jail guard Taha Kadalum nga maoy custodian ni Adam sulod sa provincial jail.