GITAN-AW kung unsa gayod ang kakulangon sa katawhan ug kung paunsa makatabang sa pagbatok niining coronavirus disease (Covid-19) nga mihatud sa tumang krisis sa kalibutan.
Sama sa gihimo karon ni Davao City 1st District Representative Paolo "Pulong' Duterte, siya nang-apod-apod og mga Personal Protective Equipments (PPEs) alang sa mga frontliners sa Southern Philippines Medical Center (SPMC) ug ang pagpang-apud-apod og mga relief goods ngadto sa tanang barangay sa distrito uno.
Nasayran nga anaa sa 54 ka mga barangay ang anaa sa unang distrito nga mao karon ang rumbuhon sa buhatan sa batan-ong kongresista diin giuna niini ang pinakapobre nga mga molupyo sa Barangay 23-C, Isla Verde, Poblacion, Martes sa hapon.
"A total of 1,135 food packs were distributed by Congressman Duterte's staff to residents living in Mini-Forest while 500 foodpacks were also given to the Maranao community in Bucana Trading along with some cash to tide them over the crisis," sa pamahayag gikan sa buhatan ni Rep. Duterte.
Kini unta ang maayong sumbanan sa pipila ka mga politiko sa tibuok nasud aron mapukan dayon ang virus nga gikabalak-an sa tanan nga mipatay sa daghang kinabuhi sa tawo sa tibuok kalibutan.
Sa San Juan City sa Kaulohan, bisan nagkapuliki sa kampanya sa pagbatok sa Covid-19, wa gihapon nawala ang bangi sa politika, nga kung sumadahon, dili kini ang husto nga panahon alang niana.
Sa padayong nakigbangi sa politika, mas maayong biyaan una kini, ang maayong himuon karon ang paghiusa ug pagtinabangay kung paunsa maluwas ang katawhan luyo sa Covid-19.
Sama sa gihimo ni Rep. Duterte ug sa pipila ka mga politiko nga anaa ang hunahuna ug kaluoy sa iyang katawhan, maoy usa ka maayong butang alang niining panahona.