KAHINUMDOM pa ba mo sa award-winning Cebuano composer nga si Dennis Cabahug?

Usa siya sa mga aktibong songwriters niadto sa Cebu Pop Music Festival diin katapusan siyang nidaug niadtong 1998 isip grand champion sa iyang song entry nga “Magpakabana” sa wa pa sila mo-migrate sa iyang pamilya sa New York niadtong 2003.

Si Dennis ug ang iyang pamilya ang lakip karon sa mga frontliner sa Covid-19 pandemic sa Albany, New York. Ang Albany mao ang capital sa New York State nga dunay pinakataas nga kaso karon sa Covid-19 sa Amerika.

“I work in (AMC) Albany Medical Center Hospital as Biomed Technician under Clinical Engineering department. Kami tig-ayo sa mga medical equipment. AMC is a private teaching hospital with about 800 bed capacity,” ni Dennis sa interbyu sa SuperKa! sa Superbalita online.

“Ang akong asawang si Clarice Colubio nag-work sad as an ICU nurse sa Albany Verirans Hospital. Ang akong anak nga si Niña is 4th year nursing student while ang akong ikaduha nga si Gail, 2nd year political science student.”

“All non-essential businesses are closed. Only grocery stores and pharmacies are open pero controlled ang number of people inside to maintain social distancing of 6 feet,” paambit ni Dennis sa sitwasyon sa Amerika.

“Bisan close ang school, naay mga volunteer nga mohatod og food sa mga kids using the school buses. Ang ubang restaurants manghatud sad og free lunch sa mga frontliner sa hospitals everyday. Maayo kaayo ang support system dire.”

“Aduna say madawat nga financial assistance ang mga way trabaho nga gitawag og “Coronavirus Stimulus checks” gikan sa gobyerno nga $1,200 per person ug $500.00 per child,” dugang pa niya.

“Naa koy mga kaila nga gipa-leave una sa ilang mga company pero gipa-file og unemployment aron ang government maoy mo-provide sa ilang temporary income. Naa sad koy mga kauban dire nga pure Cebuano. Kaluoy sa Ginoo okay ra man mi kay maayo man kaayo ang ilang support system and we always start our day with a prayer to ask for protection.”

Southern California

Ang nailang amahan sa Sinulog Festival Themesong nga si Dandin Ranillo ug ang iyang asawa lakip usab sa mga frontliner sa Petaluma, California, USA.

Pareho silang nag-alagad sa iyang misis isip mga nurse sa usa ka rehabilitation facility diin lakip sa ilang giatiman ang mga pasyente nga kritikal ang kundisyon.

“It’s not as terrible as New York, but we are scared from the spread of infection. Especially in nursing homes,” matod ni Ranillo.

“I work in a Post Acute and Rehab. Patients after surgery will be transferred to us for IV medications, antibiotics, wound care. No family allowed to go inside. Only staff. Infection is the biggest problem. It is now required for us to wear masks wherever we go.”

Kon wa ba silay planong mo-surrender na lang sa maong trabaho, ang iyang tubag sa interbyu sa Superbalita Cebu:

“Me and my wife, definitely not. And I still have a Santo Niño movie project I intend to do when this is through. I don't know when this pandemic will end, but I hope, soon.”

Tokyo, Japan

Sa Japan wala ra silay lockdown, walay curfew hours, walay quarantine pass, ug bisan ang mga sinehan abli ra basta mo-observe lang sa social distancing. Apan ang mogawas nga walay face mask dakpon.

Mao ni ang gibutyag sa Cebuanang si Juliet Suico nga nag-alagad isip medical assistant sa usa ka dental clinic sa Kita, Tokyo.

“Normal ra except for some companies ug malls nga sirado for one month. Ang ubang restaurants open ra,” paambit ni Suico nga walo katuig nang nagbase sa Tokyo kauban ang 27-anyos niyang anak nga lalaki.

Germany

Sa Germany lockdown sila hangtod Abril 19 ug ang makalapas niini adunay multa nga 25,000 euro kundi man gani kalaboso.

Apan matod ni Daphne Chloe Villamor nga basin ma-extend pa ang lockdown tungod kay padayong nisaka ang kaso sa Covid-19 sa ilang lugar diin duna nay 18,000 positive sa South Germany ug 131,000 sa kinatibuk-an nga mao nay ikalima sa tibuok kalibutan.

Ang 36-anyos nga si Daphne 16 katuig nang nagpuyo sa Nurnberg, Germany. Kadtong mga nawad-an og trabaho tungod sa pandemic matod ni Daphne nga makadawat og 5 to 25k euro gikan sa gobyerno.

Si Daphne nga lumad sa Lapu-Lapu aktibo karon sa iyang charity sa Cebu ug Davao. Siya ang nirepresentar sa Mrs. Philippines World 2019 sa Paris, France niadtong Oktubre 26, 2019 human siya nidaug nga Mrs. Philippines World 3rd runner-up EU selection sa Hamburg, Germany..