NAGPABILIN nga hulga sa African Swine Fever (ASF) sa mga binuhing baboy ug bird flu sa mga manok.
Gipasabot ni Dr. Benjamin Resma, Misamis Oriental Provincial Veterinary officer, niingon nga taas gihapon ang hulga niini karong panahona.
Giingon ni Resma nga namingaw lamang kini tungod sa hulga sa coronavirus disease o Covid-19.
“Ang threat sa african swine fever ug birdflu, wala siya nawala. Medyo namingaw tungod sa Covid-19, natabunan pero ang threat grabe labina karon,” matud ni Resma atol sa Misamis Oriental Task Force Covid-19 meeting.
Gipaabot sab niini nga mireklamo ang pipila ka mga poultry hog raiser gumikan nakahigayon kining mga delivery van nga makasulod sa checkpoint tungod kay prayoridad ang food lane.
“Naghangyo ang poultry raiser kay tungod anang food lane, ang uban ga take-advantage may gani estrikto ta di ta kapasulod sa pork products coming from Davao Region,” matud ni Resma.
Una na nga nagpagawas og kamandoan si Governor Bambi Emano nga di pasudlon ang mga pork products gikan sa Luzon ug mga lugar dinhi sa Mindanao nga adunay mga daghang kaso sa african swine fever.
Gumikan niini ang mga delivery van nga nagdala og produkto ang padayong gitsek diha sa mga entry ug exit points sa lalawigan sa Misamis Oriental aron mas hingpit gyod nga dili masudlan sa mga produkto nga kontaminado sa maong makamatay nga sakit sa binuhing baboy ug mga manok.