DIHA koy mga higala nga nagsige og chat kanako sa Facebook kung kanus-a daw mahuman ang pag-antus sa enhanced community quarantine (ECQ), diin wala ko nagduha-duha og tubag kanila pinaagi sa pinolosopo nga tubag.
Giingnan nako sila, "unsay gusto diay nato? molaag nata? na hala laag gusto man kaha ka magka-Covid, kay ning panahona, wala pa gyod mahinog ang virus, galibot-libot pa," wa na gyod siya mi-reply, mi-seen nalang.
Daghan pa sa akong mga higala ang nagpunay og pangutana, kay lagi daw mas nasayod ko kay naa daw ko sa media, diin akong tubag kanila, generic nalang, kun kung unsay tubag sa usa, mao sab tanan, ang tubag nako, "hulaton nato ang announcement ni Mayor Inday," nang-seen ra ang tanan.
Miyerkules sa hapon, dihang mi-anunsyo si Davao City Mayor Sara Duterte-Carpio pinaagi sa One Mindanao sa GMA Regional TV, nga lugwayan kun ma-extend ang ECQ gikan Abril 19, ngadto na kini sa Abril 26, 2020.
Human nabutyag ni Mayor Sara, nasigundahan pa gyod ni sa 87.5 FM Davao City Disaster Radio, diin pintok nga gibutyag ni Mayor Inday nga hangtud Abril 26, 2020 na ang ECQ subay sa rekomendasyon sa mga doktor luyo sa kahimtang sa kaso sa Covid-19 sa atong rehiyon.
Pagkahuman sa pagbutyag ni Mayor Inday, hilom kaayo ang messenger, wala na gyo'y nangutana, ug sa mga newsfeeds sa Facebook sa katawhan, walay pagkontra sa ekstensyon sa ECQ, kay nasayod na kitang daan nga kaayohan nato kining tanan.
Kay kung mapagawas na ang tambal sa Covid-19, lagmit buhian nata sa gobyerno, wala nay ECQ pero magbaguod pod lagi kita sa pagpalit sa tambal niini. Maayo lang kung miyembro sa PhilHealth, nan karon og dili, perteng luoya, kayod taman sa ginhawa aron kapalit og tambal niini.
Luyo sa ECQ, daghan kaayo baya og mga positibo nga panghitabo sa atong kinabuhi samtang nagpundo sa balay. Ang pinakauna niini, natapok ang atensyon sa tagsa ka miyembro sa pamilya, nga niadto mag-iyahay lang og panlakaw kay ma-late na sa trabaho, ug sa pag-abot, gabii na sab, ipahuway na sab, mudo, kulang ang panag-uban sa pamilya.
Nahimo sab karon ang pagtrabaho sa gipanglumutan nga mga butang sa panimalay, ang pag-ayo sa mga nangakalat, ug nasuta nga kung di na kinahanglan ang usa ka butang mas maayong ilabay na, nga miresulta sa luag ang kahimtang ug tawhay nga panghunahuna sud sa balay.
Ning mga panahona sab, nakita ang talento sa matag usa, gikan sa pagpang-garden, kakugi sa pagpanghinlo, pag-drawing ug bisan sa pagpangluto sa nagkadaiyang putahe nga wa nasulayan og luto niadtong wala pa'y ECQ.
Ug siyempre nadiskubre ang talento sa pagkuri-kuri sa atong mga katiguwangan, ma-inahan man o amahan, apohan ug bisan mga tiya ug tiyo, diha sa pagtuslok sa social media, ug nakahimo pa sa pag-TikTok.
Dili na sab pulaw ang tanan kay naa naman ang alas 6 nga curfew, makatulog na og sayo, nga maoy usa sa mga butang nga makapalig-on sa resistensya aron malayo sa Covid-19, pero bisan unsaon naa gihapo'y nagpulaw sa pagsige og TikTok.