TACURONG CITY -- Patay ang taas nga opisyal sa kapulisan human gipusil alas 4:45 sa hapon niadtong Miyerkules, Abril 15, sa probinsiya sa Sultan Kudarat.
Giila ang biktima nga mao si Police Major Victorino Pansoy, hepe sa Provincial Internal Affairs Service sa Davao del Sur Police Provincial Office.
Sa taho gikan sa Sultan Kudarat Police Provincial Office, nasayran nga sakay si Pansoy sa iyang gimaneho nga kolor pula nga Toyota pick-up nga dunay plaka LAA-8902 didto sa Purok Riverside, Barangay Sampao, Isulan, kauban ang iyang asawa ug anak.
Apan pag-abot nila atbang sa Pama Boarding House, kalit lang silang gitaparan og riding-in-tandem nga mga suspek ug gipamusil si Pansoy og kalibre .45 nga pistola.
Miikyas ang mga suspek sakay sa kolor itom nga Bajaj Kawasaki nga motorsiklo nga walay plaka, paingon sa hilit nga dapit sa Isulan.
Nadala pa sa Sultan Kudarat Provincial Hospital si Pansoy apan gideklarang dead on arrival sa doktor human makaangkon og samad pinusilan sa nagkadaiyang bahin sa lawas.
Samtang grabe sab ang kahimtang sa anak sa biktima kinsa gibalhin sab dayon sa usa ka balay tambalanan sa Koronadal City. Apan asawa sa biktima luwas sa maong hitabo.
Imbestigasyon sa kapulisan Isulan Municipal Police Station nagpadayon. (Edgar E. Fuerzas)