KUMUSTA na ang kasinatian sa Enhanced Community Quarantine? Laay ba? O igo-igo gyud nga maka-relax? O nahimo ba hinoong productive?
Sa mga way gibuhat o way mabuhat, laay gyud tinuod ang pagpalabay sa oras. Pero sa daghang gustong himuon pero wa lang gyuy higayon sa una, nahimo silang mas productive samtang nagpuyo sa balay.
May nag-imbento og mga sud-an, may nisuway pagdibuho, may nagtuon og musika, may nanahi og face masks, may nanglimpyo sa sulod ug gawas sa balay, may namanday ug uban pa.
Depende ra gyud kon gusto ka bang may mahimo o magsige lang og hayanghayang.
•••
Naunsa ba sab ning uban nga nasobraan man? Sa tinguha nga magamit ang bakanteng oras, nangaligo man hinuon sa dagat, nagpatigbakay o nagpasabong, nagpa-boxing.
Syempre, niresulta kini sa pagpundok sa mga tawo nga kontra sa gipatuman nga social distancing ug nakalapas sa kasuguan nga magpuyo sa balay.
Resulta? Gipangdakop. Mirese! Hawod, gahi og ulo, way tahod sa balaud ug awtoridad, wa mogamit sa utok!
Unya, ganahan mong ma-extend ang quarantine kay wa makontrolar ang pagkaylap sa virus? Maayo untag kamo lang ug di madamay ang uban.
•••
Malingaw man gyud ko aning Yorme (Aaron Sunga). Bisan ang ilang info video ni Jordan bahin sa pagpanghunaw gamit ang sabon.
Naa gyuy karisma ning bataa. Makalingaw bisan sa paghatag niyag instruction kon unsa ang angay buhaton aron di mokaylap ang virus.
Maayo untag mawagtang na ning corona virus aron makabalik na ang mga programa sa telebisyon ug ang tanang mga kalihukan sa kalibutan. Ginoo, dungga ang among mga pag-ampo.
•••
Kadtong video nga lainlaing pinulongan ang gigamit sa mga tawo nga nagpasalamat sa mga frontliners ug uban pang nitabang aron mogaan ang resulta sa Covid-19, nakalingaw gyud nako ang batang Pinoy nga nisultig ‘Salamat po!’ dungan ang kalit nga pag-bow nga morag naparok ang ulo.
•••
Nakahigayon kog tan-aw sa mga DVD nga natigom pero wa gyud matan-aw. Unsa ba diay ning True Blood nga ang mga bampira sige man hinuon og paaway sa kaka! Mirese! Haha!