GIANGKON ni Hidilyn Diaz ang kalisod nga iyang nasinati didto sa Malaysia taliwala ning krisis sa coronavirus nga mikatap sa tibuok kalibutan.
Apan bisan pa sa lockdown nga gi-imponer sa Kuala Lumpur, wa kini makapakgang sa iyang padayong training bisan pa man tuod og giuswag ang Tokyo Olympics.
Si Diaz didto sa Kuala Lumpur mag-training isip preparasyon sa iyang pagsalmot sa Olympic qualifying event sa Colombia.
Apan sa dihang mibuto ang coronavirus pandemic ug mipakgang sa mga sports events sa tibuok kalibutan ang Malaysia daling miimplemetar og Movement Control Order (MCO) aron pag-alkontra sa virus.
Niini wala na makabalik pa sa nasod hangtod karon ang Olympic silver medalist nga Filipina weightlifter ug pinaagi sa Instagram, iyang gisaysay ang iyang kasinatian.
Niadtong Dominggo, siya mipahigayon og workshop pinaagi sa social media (Zoom) isip ilang fundraiser.
Sa niaging adlaw, iyang giingon nga miabot na ngadto sa P60,000 ang ilang natigom. Ingon niya nga mopahigayon pa usab sila og laing edition sa workshop.
Sa samang higayon, iyang gisaysay ang pag-implementar sa MCO sa Malaysia.
Matod niya nga sa dihang gipasunod ang Phase 1 sa MCO sa Malaysia, gibati niya ang kakulba, kabalisa, kasagmuyo ug anaa sa iyang hunahuna kon unsaon nila pag-survive sa sitwasyon.
Ubos sa MCO, kontrolado sa mga polis ug military ang mga kalihukan sa mga tawo sa siyudad ug daghang mga negusyo ug gyms ang gipangsirhan.
Human nga giinat ang lockdown, nagtuo si Diaz nga nigrabi na ang pagkatap sa virus sa nasod.
Tungod niini, nanawagan siya sa mga Pinoy didto sa Malaysia nga mosunod sa mga lagda sa quarantine ug anaron usab ang social distancing.
Ang panawagan ni Diaz, ingon niya, nga dili lang sa Malaysia kon dili gusto usab niya kining ipaabot dinhi sa Pilipinas.
“This doesn’t just apply to me and my coaches here in Malaysia, but to my fellow Filipinos back home,” matod niya.
“The frontliners are risking their lives for us, and we should do our part as well. They cannot make it without our cooperation,” ni Diaz pa nga nakutloan sa news.abs-cbn.com. (JBM)