MUSTA na, higala, kaya pa ba? Wala nay maayong laki o baye karong panahona. Lisod pod magpahilas-hilas sa kasamtangang panahon kay ang Covid-19 o coronavirus disease nagpahinomdum kanato nga ang Dios Amahan lamang ang adunay gahum ug nagkupot sa atong mga kinabuhi dili relihiyon, pastor, pari o presidente sa nasud.
Diri sa among purok, nagatapok ug nagapalupad gihapon og tabanog ang mga bata. Daghan pod koy nakita sa among mga barangay ug syudad nga nakasul-ob lagi og face mask pero kutob ra sa suwang-haaaaaayyy!!! Wa gihapon nama-o.
Daghan ang naguol nga hangtod Abril 26 sa kasamtangang tuig ang "lockdown." Sa pagkatinuod, I have a feeling nga maabot pa kini sa Hunyo (palayo!!!). Busa, ginapangandaman namo sa among pamilya ang pangkunsumo ug pinansyal nga bahin, higala.
Mapasalamaton ako sa mga hinabang nga natunol sa lokal nga panggamhanan. Nalipay pod ako nga pipila pod ang mga tawo nga dili man adunahan apan dako kaayo ang mga kasingkasing sa pagtabang sa isig-kaingon.
Saludo ug pasalamat sa atong mga frontliner. Dili gayud ko komportable magsul-ob og mask apan ang mga personahe sa ospital-mosobra pag walo ka oras nga igang, baga ug guot ang PPE (personal protective equipment). Lord, have mercy.
Sa mga naa sa pwesto, hinaut nga magmaisug ug ligdong ninyong serbisyohan ang katawhan bisan dili kamo ang gibutohan. Matod pa ni President Rodrigo Roa Duterte (PRRD), kung mapusil pa lamang ang coronavirus; hagbay ra kining nasolbad. Since Science ang problema; Siyensya pod daw ang katubagan sigon niya.
Ang pagpaubos ug pag-ila ni PRRD sa gahum sa Dios nga hugot nga kasolbaran sa pandemic nagapakita lamang nga anaa kita sa desperadong panahon. Dili kini masolbad sa ka-brayt sa tawo kundi sa gahum lamang sa Ginoo.
Daghang nanginahanglan. Daghan pa gyud seguro ang magutuman. Sa ingon aning panahon, unsa man ang atong angayang palabihon? Karong pait-pait ang panahon, manggawas na gayud ang matuod nga kolor nato, igsuon.
Wala naapod og tarung ang budget o relief goods, giugum sa tigdala mao napasmo ang mga walang-wala, ug uban pang imperpeksyon sa pagdumala sa purok hangtud sa nasudnong liderato apan ang pangutana, "What can we do...to help???
Daghang pwedeng ireklamo pero mas makapalabad kini sa lideres nato. Pwede maminaw ug magpundo sa ta sa mga kabalayan nato? Dili man god tanan magkasakit dayon apan tanan mamahimong carrier o makapatakud sa virus nga makamatay kanato.
Lisod gud, but kinahanglan man gyud nato magsakripisyo aron sa ikaayo sa tanan. Duol kitang tanan sa Dios Amahan. Siya na ang bahala kanato tanan.
"The Lord giveth and the Lord taketh away. Blessed be the name of the Lord!" Job 1:21.