MOARANGKADA na sa ikaduhang hugna ang pagpang-apod og mga relief goods sa 182 ka mga barangay sa Davao City karong Lunes, Abril 20, 2020. Ang mahatagan kadto lamang naggunit og mga ration cards nga gikan sa barangay.
Giingon ni Davao City Mayor Sara Duterte-Carpio nga tulo ka hugna ang giandam sa lokal nga kagamhanan ning siyudad subay sa pagpatuman sa enhanced community quarantine (ECQ) labi na karon nga nahatagan kini og lugway padung Abril 26, 2020.
Una niini, ang mayor nagbutyag nga dunay paigo nga salapi ang lokal nga kagamhanan ning siyudad alang sa pagkaon sa katawhan luyo ning ECQ aron mabatukan gayod ang coronavirus disease (Covid-19).
"Karong Lunes, Abril 20, 2020 ang atong second-round sa atong ration, naa tay gitagana nga tulo ka hugna niini pasa sa ECQ," sumala ni Mayor Sara atol sa regular nga interbyu niini sa 87.5 FM, Davao City Disaster Radio niadtong Miyerkules sa gabii, Abril 15.
Nagpasalig si Mayor Inday, busa dili angay maguol ang mga residente ning 182 ka mga barangay sa Davao. Ang guol lamang karon kay lagmit madugay paghatud sa mga relief goods sa ubang barangay.
Dili baya kini ingon nga kung Lunes, karong Lunes tanan mahatdan, gani sa unang round dul-an duha ka semana una nahuman ang paghatud sa mga relief goods gumikan nagka-problema sa mga mo-repack.
Maayo nalang gani, kay pinaagi sa Davao City Agriculture, nahatagan og tibuok manok (dressed chicken) ug mga gulay ang mga wala naapil sa ration cards, naalibyohan kadyot ang kakuwang sa pagkaon sa pamilya.
"Ang unang mahatagan sab sa ration kadtong unang mga barangay sa round-one nga nakadawat, the same ang proseso aron han-ay ang tanan, ug dili ta angay mabalaka kay naa ta'y money sa City to buy foods," dugang sa mayora.
Unta daghan na ang mang-repack aron dali nalang mapadala sa mga molupyo sa Davao City ang mga relief goods. Naa untay mga tawo gikan sa matag barangay ang motabang sa pag-repack aron mapadali ang tanan, hinaut unta.