KAPIN duha na ka semana sukad giimplementar ang Community Quarantine ug lockdown para malikayan ang paspas nga pagtakod sa Coronavirus labi na kay hangtod karon wala pa gihapo’y nadiskobre nga tambal pagbatok ini.
Gani, matod sa Covid-19 Information Center, dul-an na sa dos milyones ka mga tawo sa tibuok kalibutan ang natakdan ini. Ang mga nangamatay subra na 148 ka mil samtang ang mga naulian dul-an sa 500 mil.
Daghang mga estudyante ang nangalipay kay na taas-taas ang bakasyon apan ang mga ginikanan labi na mga mamumuo ug trabahante nangaguol kay wa namay klaro kung makabalik pa ba sa ilang trabahoan ohg panginabuhi.
Unya kay sirado man halos tanan unya way bisag pampublikong kasakyan, napugos ang tanan pagpuyo sa balay unya gipanglaay na.
Diay akong mga suhistiyon aron di tantong mapul-an samtang nagpuyo sa balay:
Nag-una sa listahan kining pag-ehersisyo. Gawas nga makapabaskog sa panglawas, makapasingot pa. Kung mag walking o jogging diha sa tugkaran, makakuha pa gayod og Bitamina D nga gikan sa adlaw. Ang ka-init sab ini makatabang pagpatay ining kagaw.
Sunod ang pagkaon og mga masustansiyang pagkaon sama sa utanon, lagutmon og prutas. Mas lamian pa gayod kung lutong bahay ni nanay kay gawas nga presko, lami, og bag-ong hukad.
Mao na sab ning panahuna karon nga mas daghang oras ipahuway ug katulog mga 6-8 ka oras kada adlaw.
Higayon na sab karon nga makakukabildo pina-agi sa telepono o video chat/call sa mga kaparintihan, higala, klasmets o silingan. Ining pa-agiha matambalan ang kaguol ug kamingaw. Ang kabanay sab maka bonding-bonding.
Aron dili ma-stress, likaye una ang pagpaminaw og mga balita mahitungod sa Corona Virus labi na atong mga binuang, exaggerated, hinimo-himo sa katol og dila o fake news.
Hinuon, pangita og paagi nga maka-relax nga di kaayo gasto sama sa paghimo sa imong paboritong hobby: Panahi, pag-ginansilyo, basa, sayaw, gardening, yoga o ba kaha tan-aw sa mga paborito nimong salida.