Mibilar kritikal

KRITIKAL ang kondisyon sa usa ka panday human gipusil gikan nga nagbilar sa patay nilang silingan.

Ang pagpamusil nahitabo pasado ala una kagahapon sa kaadlawon sulod sa usa ka tindahan atubangan sa Mactan Doctors Hospital sa Barangay Basak, siyudad sa Lapu-lapu.

Ang samdan sa iyang ulo giilang mao si Rene Pajarito, 23, taga Sityo Iba, Basak, Lapu-lapu city.

Matod ni PO1 Maximo Villagonzalo Jr., sa Lapu-lapu Police Homicide nga gikan nagbilar ang biktima sa namatay nilang silingan.

Samtang nagbilar, nagkalingaw kini og inom sa uban niyang mga silingan.

Nakahukom ang grupo nga moundang na sa inom, hangtod nga nagkasinabut nga mangaon og init nga noodles.

Dihang nakasulod na ang biktima sa tindahan uban sa laing duha niya ka mga silingan, misulod ang usa ka tawo ug dayong pusil sa biktima.

Natumba ang biktima ug daling nakasibat ang suspek.

Ang kauban sa biktima daling nidala kang Pajarito sa tambalanan ug anaa sa kritikal nga kondisyon.

Dugang nasayran sa kapulisan nga ang mga kabanay nihulagway nga buotan ang biktima ug way giapilan nga grupo sa mga batan-on.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph