MGA senior citizen nga wa makadawat sa P4, 000 nga allowance sa gihimong releasing niadtong Sabado ug Dominggo di angayang mabalaka kay ila gyud kining madawat.
Sa gibanabanang 7,000 ka mga senior citizen nga wa makadawat sa cash incentive alang sa 2009, kapin lang sa 4,000 ang nahatagan sanglit ang uban nagkaproblema kay wa ang ilang ngan sa payroll samtang ang uban wa gyud sa masterlist.
Gipasabot hinuon ni Guillermo Casinillo, pangulo sa Office of the Senior Citizen’s Affairs (Osca) sa siyudad sa Sugbo, nga di angay maguol kadtong mga kuwalipikado ug nakakompleto sa ilang mga rekisitos kay posibleng nataligam-an lang gyud ang ilang ngan sa DSWS ilabina kay gipadali ni Mayor Tomas Osmena ang pag-release na niini.“Ang pung sa mayor every senior citizen sa siyudad matagaan gyud. Duna man tingali gamay’ng kalangay pero makadawat gyud ang tanan,” pasalig ni Casinillo.
Giklaro niini nga di ang ilang buhatan maoy mabasol sa pagka-missing sa ngalan sa ubang mga senior citizen sanglit di man sila maoy mohikay sa masterlist ug sa payroll.
Hinuon masaligon si Casinillo nga dunay himuong supplemental payroll ang DSWS alang niadtong wa makadawat sanglit naa naman gyuy budget alang sa maong mga senior citizen nga ni-file sa niaging tuig.
“Mao nay wa nako masabti kay gibugkos man gyud na tanang application pagdala ana didto sa DSWS mga later part sa November ug December na gidala didto. Ang ako mao man lang ang pag-appreciate kung mo-qualify nya sila (DSWS) nay mo-prepare sa masterlist ug sa payroll,” pasabot ni Casinillo.
Giawhag lang niini ang mga senior citizen nga wa pa makadawat nga subling mopa-kopya sa ilang voter’s certification ug idiretso og hatod sa DSWS pagmatuod nga kuwalipikado na silang modawat sa allowance.
Nasayran nga ang mga senior citizen lang nga narehistro sa 2007 paubos nga makaduso sa gipangayong mga rekisitos ang mahimong hatagan sa allowance.
Alang niadtong nagparehistro sa 2008 ngadto sa 2009, matod ni Casinillo nga mobotar una sila karong Mayo 10 ug mahimo na dayon silang mo-submit sa ilang mga dokumento aron maka-avail na sa incentive. (CPL)