BISAN og asa ka karon molantaw og mga balita telebisyon, radyo, mantalaan, ug social media, pulos coronavirus disease (Covid-19) ang mga topiko, dili ka makalikay sa pagtan-aw ug pagpaminaw kung unsa na’y mga latest nga balita sa tibuok kalibutan.
Ang bintaha nga balita dinhi sa atong nasud sa Pilipinas tungod kay milabaw na ang mga naka-recover sa kompermadong nagka-Covid kay sa mga nangamatay, halos 400 na ang labaw sa mga naka-recover kaysa mga namatay.
Sa gawas sa atong nasud, naglumbaanay kung kinsay daghan og mga patay, pinaagi sa Covid-19 ug nag-una pa gihapon ang America karong panahona, ikaduha ang nasud Italy, ug ikatulo mao ang Espanya, sa kalibutanon nga ihap muabot na ngadto sa dul-an 2 milyon ka mga tawo ang biktima.
Tanang mga nasud sa kalibutan istriktong nagpatuman sa lockdown o mas nailhan niini mao ang enhanced community quarantine (ECQ) diin gipatuman ang social distancing ug daghang pamaagi aron pagseguro nga dili daghan ang matakdan niining maong makamatay nga kagaw.
Didto sa nasud sa Italya, ila nang gipasagdan nga mangamatay ang mga tigulang o kining mga senior citizen ug didto sa uban pang mga nasud, ug ang gipaningkamotan nga masalbar mao ang mga batan-on ug mga empleyado kay matud pa, mga productive pa sila, kung itandi sa mga edaran mga non-productive na.
Sakit man paminawon, pero maoy tinuod, ug buot hunahunaon nagpahimulos na ang gobyerno niadtong panahon sa ilang pagkabatan-on kay mga tax payer man sila, karon dili na sila kapahimuslan sa gobyerno, gibaliwala na ang ilang katungod sa pagpakabuhi taliwala niining dakong trahedya nga atong giatubang.
Didto sa laing nasud, sama sa America aduna sila’y home for the aged, nga kung tigulang kana, ug wa kanay pakinabang, didto kana ibutang sa imong mga anak, kay maka-disturbo ka sa ilang inadlaw-adlaw nga panglihok-lihok; dinhi sa ato, aduna kita’y home for the aged, pero, kadtong wala na gyud siya'y mga mga anak ug paryente, pero, kung aduna pa, di gyud nato ipasagop sa home for the aged kay batasan nato nga mahal nato ang atong mga katigulangan ug dili kita mapul-an sa pag-atiman ug pag-alima kanila.
Mga senior citizen, dili mo magpabadlong, kay lahi ang kultura natong mga Pilipino, mapagmahal kita sa atong mga katigulangan, gani ang balaod karon hugot nga gipatuman sa gobyerno, mao nga pugngan gyud ang mga senior citizen nga mogawas sa ilang balay, kay dali rang mamatay kon matakdan sa Covid-19, sa katarungan nga hinay na ang ilang resistensiya.
Buot-ipasabot, gimahal ug girespito kita sa atong gobyerno busa, dili nato abusuhon kining pagpakabana sa gobyerno kanatong mga edaran, mopatuo kita kung unsay balaod nga ilang ipahamtang kanato.
Kining tanan dili para sa kinsa paman, kon dili para sa kaayohan, busa ayaw intawon pagpabuyag, patuo sa atong gobyerno para sa kaayohan ug kaluwasan hangtud asa kutob kining dakong pagsulay nga gipahamtang kanato sa Kahitas-an, kung Iya mang pagbuot kining tanan.