PIPILA ka mga sakop Police Regional Office (PRO)-Northern Mindanao ang naka-quarantine karon panahona.
Kini ang gikumpirma ni Police Lieutenant Colonel Mardy Hortillosa, ang tigpamaba PRO-Northern Mindanao, ug nibutyag nga niadtong bulan sa Marso, adunay upat ka personahe sa regional office nga gikan sa kaulohan ug awtomatiko nga gipaubos sa kwarantinas.
Gani natapos na usab nila ang ilang 14 ka adlaw nga home quarantine.
Ning bag-o, gikumpirmar sab niini nga ang usa ka chief of police nga anaa sa Bukidnon ang naka-home quarantine human nga na close contact niini ang positibo sa coronvirus disease (Covid-19) didto sa Bukidnon.
"Pag naka-close contact ka sa positive sa Covid, automatic ka nga person under monitoring ug automatic ka nga mag quarantine," matud ni Hortillosa, ug mipasabot nga walay gibati sab ang maong pulis ug gani padayon sa iyang trabaho nga gipaagi lang niini sa mga online.
Gibutyag sab niini nga sa pagkakaron, gikinahanglan sab nila ang personal protective equipment alang sa mga quarantine checkpoints labina lain-laing indibidwal ang maatubang sa kapulisan diha sa mga checkpoints.
Gikan Abril 17, nasuta nga adunay 65 ka mga kumpirmadong kaso sa Covid-19 sa han-ay sa kapulisan sa nasod sa Pilipinas.
Sa maong gidaghanon, 40 niini ang pabiling anaa sa balay tambalanan, 14 ang naka home quarantine, 8 ang nakarekober ug 3 ang nakabsan sa kinabuhi.