KUMUSTA na mo diha? Anaa ta karon sa enhanced community quarantine (ECQ) hangtod sa Abril 26 tungod sa makatakod nga sakit nga coronavirus disease (Covid-19).
Dugay ang tanggong sa balay busa dili malikayan nga bation og kalaay. Apan kahibalo ba mo nga pwede gamiton ang musika pang-kontra Covid-19? Kanta lang mokanunay o tugtog ug instrument aron wagtang ang virus.
Sama kini sa gihimo sa diha sa Calinan sa balita nga gisuportahan ni Kongresista Isidro "Sid" Ungab sa Third District, ang plano sa pipila ka kapitan sa barangay nga ibalik ang pagtuon sa rondalla sa mga kabataan sa maong distrito.
Gibutyag kini ni Punong Barangay Nestor Mutia sa Barangay Lampianao atol sa pagdawat niini og walo ka mga instrumento sa rondalla gikan sa Pagyamanin Likas Musika (PLM): Rondalla Instrument Lending Program.
Matud pa ni Kapitan Mutia nga nalipay ang kongresista nga nasayran nga may grupo nga interesado nga mosuporta aron makakat-on ang mga bag-ong tubo sa musika og kultura nga gikan sa atong mga katigulangan.
Dugang ni Mutia nga buot ni Kongresita Ungab nga mo-sponsor og balaod aron madasig ang kabatan-onan sa elementarya ug high school sa pagtuon og musika gamit ang mga instrumento nga may kwerdas sama sa gitara, oktabina, bandurria, laud, violin, ukulele, ug bajo de arco nga talagsa na lang nato madunggan.
"Maayo nga nasugdan ninyo sa Barangay Lampianao basin matabangan nato ang uban pang barangay nga makatukod pud og ilang kaugalinong grupo sa rondalla", sumala pa ni Ungab. Gawas sa isports, ang pagtuon sa musika maoy usa sa mga epektibong paagi nga makalikay ang kabataan ug kabatan-onan sa dautang bisyo sama sa pag-inom og alak, sugal, pagpanigarilyo ug paggamit sa ginadili nga druga.
Tukuron sa barangay ang Lampianao Community Rondalla Troupe nga pagasalmutan sa mga hamtong ug Lampianao Children Rondalla Club sa mga estudyante sa Lampianao Elementary School. Ang Barangay Lampianao nga nahisakop sa Calinan District ug usa sa pinakagamay nga barangay sa syudad sa Davao maoy nakadawat sa PLM Rondalla Instrument Lending Program karong tuiga.
Ang programa gipasiugdahan ni Mr. George G. Gange, usa ka overseas Filipino worker (OFW) nga nagpuyo sa Amerika nga mahilig usab sa musikang Pilipinhon. Matag tuig manghatag ang programa og mga instrumento sa rondalla sa mga kabus apan interesadong grupo sa kabarangayan sa Pilipinas aron makatukod og kaugalingong rondalla troupe ilabi na sa mga kabataan.
Programa sab sa PLM mao ang pagpahigayon sa "Kwerdas ng Pag-ibig at Pagkakaisa Rondalla Festival" sa bisan asang lugar sa Pilipinas nga pagasalmutan sa mga grupo nga nahatagan og instrumento. Niadtong bulan sa Pebrero 2020, gipahigayon ang festival didto sa Makati City.
Sa sunod tuig, kung wala na ang Covid-19, pagahimuon kini didto sa Kapalong, Davao del Norte diin ang mo-host mao ang lokal nga kagamhanan sa Municipality of Kapalong ubos sa liderato ni Mayor Tess Timbol. Gidawat ni Punong Barangay Mutia ang mga instrumento gikan ni Ms. Sandra Elizaga, ang Mindanao Coordinator sa maong programa ug opisyal sa Worldwide Filipino Alliance-Pangdaigdigang Alyansa ng Pilipino Inc. diin sakop si Mr. Gange.