MALITA, Davao Occidental -- Gitakdang mohatag og donasyon nga P3 milyones sila si Davao Occidental Governor Claude Bautista ug anak niing si Dumper Partylist Representative Claudine Diana Bautista og kantidad P2 milyones ug P1 milyones alang sa mga staff members sa Southern Philippines Medical Center (SPMC) sa Davao City kinsa nanguna sa pakig-away batok sa coronavirus disease (Covid-19) sa rehiyon.
Nakadayeg ang mga Bautista sa malumong kasing-kasing ni Davao City Mayor Sara Duterte-Carpio, kinsa unang mi-anunsyo sa miaging semana nga iyang i-donate ang usa ka tuig nga sweldo nga mokabat sa kapin P2.1 milyones alang sa mga SPMC frontliners.
Si Duterte ang mihanyag sa iyang sweldo aron ibutang nga trust fund alang sa SPMC staff members nga maoy nag-atiman sa mga pasyente sa Covid-19.
Gikanayon nga ang matag frontliner nga mag-positibo ang makadawat og P50,000.
Sayo niini, gikataho nga aduna'y 12 ka mga SPMC staff members ang nag-positibo sa kagaw diin duha kanila ang namatay.
Ang SPMC mao ang nag-unang pasilidad nga gidalhan sa mga pasyente sa Covid-19 dinhi sa Mindanao ug aduna sab laboratory nga naga-eksamin sa mga swab samples gikan sa mga Covid-19 suspects sa Mindanao.
Buot sa mga Bautista nga hatagan og importansya ang mga staff members sa SPMC kinsa kanuna'y naga-risgo sa ilang kinabuhi maluwas lang ang mga pasyente nga nataptan sa Covid-19.
Dako sab ang pag-saludo sa mga Bautista sa paningkamot ni Mayor Duterte, kinsa mao ang pamuno sa Davao Region Inter-Agency Task Force on Covid-19, human gipakita niini ang tinud-anay nga pakigbisog aron makontrola ang pagkuyanap sa sakit dinhi sa rehiyon.
Sa miaging semana, mokabat sab 750,000 ka mga face masks ug 450 thermal scanners ang giapod-apod sa Dumper partylist sa lima ka mga probinsya sa Davao.
Nakig-alayon ang Dumper partylist sa Task Force Davao, Armed Forces of the Philippines (AFP) Eastern Mindanao Command, 10th Infantry Division sa Philippine Army, ug ni Davao City Representative Paulo Duterte sa tinguhang makontrola ang Covid-19 sa Davao region.
Mga medical professionals ug frontliners sa Davao del Norte, Davao de Oro, Davao Oriental, Davao del Sur ug Davao Occidental ang naka-benepisyo sa maong inisyatibo.
Naningkamot sab si Representative Bautista nga makahatag og dugang suporta sa pagpakgang sa Covid-19 pandemic pinaagi sa instalasyon sa mga sanitation tents, paghatag og cash assistance, food packs, ug uban pang medical supplies sama sa disinfectants sa nagkadaiyang barangay ug mga civic groups sa rehiyon. (Orlando B. Dinoy)