GIBAROGAN sa hepe sa Police Regional Office (PRO) 7 nga legal ang ilang pagdakop kang Maria Victoria Beltran, usa ka manunulat ug sakop sa usa militanteng grupo sa Sugbo, tungod sa matod pa sayop nga impormasyon sa Covid-19.
Matod ni Police Brigadier General Albert Ignatius Ferro, ang hepe sa PRO 7, nga lehitimo ang ilang pagdakop kang Beltran nga gikwestyon sa mga progresibong grupo sa Sugbo tungod kay, matod pa, ilegal kini.
Gipasabot ni Ferro nga nakalapas sa balaod si Beltran nga angayan lang nga dakpon kini ug pasakaan og kaso.
Ang iyang post sa social media walay gisuporta nga ebidensya gikan sa ahensya nga maoy gitahasan nga mo pahibawo niini sa publiko.
Nakahatag usab og kahadlok ang maong sayop nga impormasyon sa iyang social media account.
Matod sa abogado ni Beltran nga si Vincent Isles, illegal ang pagkasikop ni Beltran. "Our rules are very clear when an arrest without a duly issued warrant from the court could occur: caught in the act, hot pursuit, and escapee from jail. None of these three exists. She was not caught in the act of committing a crime. There was no hot pursuit. Obviously she is not an escapee.”
Si Isles nagkanayon nga usa ka team sa mga abogado ang morepresentar kang Beltran atol sa inquest proceedings.
Si Isles naghinaut nga ma-dismiss ang ipasaka nga kaso sa iyang kliyente.
Sa pagkakaron, ang kampo ni Beltran nagpaabot sa kalamboan sa kaso.
“Atty. Benjamin Militar will be visiting her this afternoon to reassure her that we are one with her against this petty act by our government,” matod ni Isles ngadto kang Beltran.
Girespeto niya ang panawagan sa mga militanteng pundok nga pabuhian niini si Beltran apan aduna usab silay ebidensya nga magpamatuod nga nakalapas sa balaod ang maong babayeng manunulat.
Una nang mibahad si Mayor Edgardo Labella nga iyang ipadakop si Beltran tungod sa pagpost niini sa facebook labot sa kaso sa mga nagpositibo sa Covid-19 sa barangay Luz.
Niadtong Dominggo sa kaadlawon, Abril 19, nadakpan sa mga sakop sa Regional Intelligence Division si Beltran sa sulod sa iyang restaurant nga nahimutang sa Barangay Kamputhaw sa dakbayan sa Sugbo. (AYB)