DUL-AN sa P650 milyones ang natunol sa Department of Social Welfare and Development (DSWD) 7 nga hinabang ngadto sa mga kabus sa Central Visayas pinaagi sa Social Amelioration Program human gisugdan sa pagpanghatag niadtong Marso ngadto na sa Abril 21.
Sa labing uwahi nga datus sa DSWD 7, anaa na sa 107,240 ka pamilya sa Central Visayas ang nahatagan sa tag- P6,000 nga ayuda sa gobyerno subay niining krisis sa Covid-19.
Anaa sa lalawigan sa Negros Oriental ang labing daghang pamilya nga nahatagan diin niabot na sa 54,519 ang nakadawat nga gisundan sa lalawigan sa Sugbo diin 33,315 ka pamilya.
Adunay 14,831 ka pamilya sa lalawigan sa Bohol, samtang 4,575 sa lungsod sa Siquijor.
Niabot na usab sa P327,114,000 ang nahatag sa Negros Oriental, P199,890,000 alang sa Sugbo, P88,986,000 gi apod-apod sa Bohol, ug P27,450,000 alang sa Siquijor.
Nasayran nga anaa sa 1,056,751 ka pamilya ang beneficiaries sa Central Visayas nga makadawat sa SAP, samtang anaa sa P6,340,506,000 kini nga pundo nga gitagana alang sa rehiyon.
Anaa sa 597,176 ang beneficiaries sa Sugbo, 249,474 sa Negros Oriental, samtang 182,064 sa Bohol, ug 28,073 sa Siquijor.
Sa 132 ka mga local government units sa Central Visayas anaa na sa 127 ang natunolan sa DSWD 7 sa maong pundo nga nagkantidad ngadto sa P5,860,830,000.
Ang maong datus walay labot ang benepisyaryo sa Pantawid Pamilyang Pilipino Program (4Ps) sa DSWD nga maoy unang nakadawat sa maong ayuda sa gobyerno.
Kaduha kini sila makadawat sa P6,000 nga ayuda, alang sa buwan sa Abril ug Mayo. (HBL)