SA MIAGING semana, atong nahisgutan dinhi nga naay wala naapil sa listahan sa modawat og hinabang tungod kay nipatigbabaw ang "politics of patronage" nga uso sa atong nasud. Buot ipasabot, ang giuna sa mga opisyales sa barangay ang mga tawo nga suod nila ug nakatabang sa milabay nga eleksyon.
Mao ni ang hinungdan nga nagmando ang Department of the Interior and Local Government (DILG) nga ipapaskin nila ang listahan sa mga nahatagan og Social Amelioration Program (SAP) sa Department of Social Welfare and Development (DSWD) diha sa barangay.
Apan sukad nga gimando sa DILG ngadto sa mga opisyales sa barangay nga ipaskin ang listahan sa mga nahatagan, wa pa koy nadawat nga report nga nituman na sila.
Ambot lang kaha kung unsay ilang gikahadlokan? Aw, basin nahadlok nga masayran nga ang ilang nahatagan mao kadtong di kabus sa tanang kabus.
Sama niining nahitabo sa usa ka barangay sa among lungsod sa Sulop, Davao del Sur, diin nagkarambola ang kapitan ug mga kagawad.
Suma pa sa report, duha ka mga barangay kagawad ang nagpa-blotter sa kapulisan human gipasanginlan sila sa kapitan nga maoy nagsumbong sa Municipal Social Welfare and Development Office (MSWDO) ug Municipal Local Government Operations Officer (MLGOO) nga nakadawat ang kaipon sa kapitan og ayuda nga di unta angayan nga modawat.
Niadtong Biyernes, Abril 17, sa alas 7:45 sa gabii gireklamo sa duha ka mga kagawad ang ilang kapitan, lakip na ang iyang inahan nga kagawad usab sa lugar, ug amahan kinsa namasangil kanila nga maoy nagsumbong.
Giingon nga hilabihan ang kasuko sa kapitan ug iyang mga ginikanan mao nga gitudlo-tudlo sila ug gilambos sa inahang kagawad ang iyang bakus atubangan sa mga kagawad.
Sa iyang kasuko, gisulti niini: "Wala mo kaila kung kinsa mi, sugdan ta ni, pwede namo doblehon ang kantidad nga giuli sa DSWD, basi gusto mo pakaunon ta mo og kuwarta?" Kini ang nakaaghat nila nga moreklamo sa pulis.
Nakaseguro ko nga di lang kini ang nahitabo dinhi sa atong rehiyon, daghan pa ang mga anomalya nga nahitabo.
Busa, atong gihagit ang DILG nga silotan gayud ang mga kapitan ug mga mayores nga wala mituman sa guidelines sa ayuda sa gobyerno sa mga apektadong pamilya sa Covid-19.