DAW nasagmuyo karon ang lokal nga kagamhanan sa Davao City gumikan luyo sa paningkamot niini aron mabatukan ang coronavirus disease (Covid-19) diha gihapoy pipila ka mga gahi'g ulo nga mga Dabawenyo.
Sa pakighinabi kang Davao City Mayor Sara Duterte-Carpio sa 87.5 FM dcDR, gibutyag niini nga taliwala sa gipahugtang enhanced community quarantine (ECQ) sa siyudad, naa gihapo'y mga reklamador ug gahi'g ulo.
"Kung daghan ang mga nasakit ug mamatay, mag-reklamo tanan. Kung buhatan og pamaagi para ma-control ang masakit aron dili mamatay, mag-reklamo pud tanan. So asa ninyo gusto ibutang ang inyohang gobyerno?" sulti ni Mayor Inday.
Gipasabot niini nga gituyo sa kagamhanang lokal nga mahitabo ang clustering ug ang number coding scheme sa mga Food and Medicine (FM) pass aron makubsan ang paggawas sa mga tawo.
"Wala mi niadtong Sunday (Abril 19) because gi-meetingan na siya (clustering). So samtang kamo naa mo'y Sunday, ang gobyerno, naghuna-huna paunsa dili mo masakit tanan ug di mo mangamatay tanan," pagpasabot ni Mayor Sara.
Pagpundo og balay, kini ang gihangyo karon sa gobyerno, ug gani gipaneguro sa gobyerno nga mahatagan gyud og pagkaon ang matag balay ug ang mga ayuda sa gobyernong nasyonal, gipaabot sa tugkaran aron sa ingon, di lagi mogawas sa balay, gawas lamang sa pagpalit ug pagkaon, tambal ug emerhensiya.
Abi man nato'g ang "Dabawenyo Disiplinado." Kini baya ang gikapanghambog nga slogan sa tanang taga Davao City. Nganong karon naa man gihapo'y gahi'g ulo? Gani ang Davao City Police Office (DCPO) nakadakop og 631 ka mga violators sa ECQ gikan Abril 4 hangtud Abril 19, 2020.
Nagplano na baya si Mayor Sara nga mopalit og crematorium aron mapaspasan ang pag-cremate sa mga mangamatay kay kung ingon niini ang dagan sa panahon nga daghan og mga gahi'g ulo, lagmit modaghan sab ang mga mangamatay sa Covid-19.
Unta di kini mahitabo, busa magpatuo, di mogawas sa balay kung dili gayod kinahanglan, ug motuman sa ubang mga gipasunod sa balaud niining panahona.