NADAKPAN ang usa ka barangay kagawad human nagpahigayon og drug buy-bust operation ang pwersa sa kapolisan sa Barangay Matangad, lungsod sa Gitagum, Misamis Oriental.
Ang drug operation gilangkoban sa Gitagum Municipal Police Station (GMPS) sa pagpangulo ni Police Senior Inspector Joan Galvez, Provincial Intelligence Branch (PIB) nga giulohan ni Police Chief Inspector Esperidion Viado ug mga elemento sa Provincial Drug Enforcement Unit lakip Regional Drug Enforcement Unit sa pagpangulo nila ni Police Senior Inspector James Batastas ug personahe sa Philippine Drug Enforcement Agency (PDEA) Misamis Oriental.
Giila ang mga dinakpan nga mao si Dario Y. Loretche, 49, minyo, ug usa ka barangay kagawad.
Gikonsidera si Loretche nga usa ka high value target ug anaa sa ikapito sa listahan sa drug watchlists.
Nakuha sa iyang posisyon ang usa ka pakete sa gitouhang shabu nga napalit sa ilang gipatuong buyer.
Lakip sa nakumpiska ang mga nagkadaiyang illegal drug paraphernalia ug cash nga moabot sa P1,080.00
Matud sa kapolisan nga dili tiaw ang ilang gihimong monitoring ug beripikasyon aron lamang nga masikop ang suspetsado.
Ang dinakpan ang gibalhog na sa prisuhan sa Gitagum Municipal Police Station (GMPS) kinsa gikatakdang mag-atubang sa kasong supak sa Republic Act 9165 kon Dangerous Drugs Act karong panahona.