DALAYGON ug angayan pasalamatan sa katawhang Dabawnon ang sakripisyo nga gihimo ni Davao City Mayor Sara Duterte-Carpio sa pagbutang sa iyang sweldo sa tibuok tuig sa trust fund alang sa mga frontliners sa Southern Philippines Medical Center (SPMC).
Sila ang mga tawo nga gipadaplin ang personal nga interest aron sa pagluwas sa kinabuhi sa kadaghanan bisan sa risgo nga ilang ginaatubang.
Usa ka maayong gawi sa lider ang gipakita ni Mayor Inday ang pag-unong sa kalisud sa iyang ginsakpan. Bugtong hangyo ni Mayor Inday, "puyo mo sa balay."
Samtang nagsakripisyo ang mayor, dunay ubang negosyante nga ginansya ra'y gihunahuna, gisakyan ang panahon ug gipatas-an ang presyo sa baligya nga bugas tungod sa kahakog sa kwarta.
Daghan kuno nga hinungdan kay taas sab ang gasto sa ilang pagpalit. Inyo man ilaron ang katawhan nga stock na man na sa inyong bodega sa wa pa'y sugod sa lockdown! Naa pod mga ahensya sa gobyerno ginahimo ba kaha nga uto-oto sa mga negosyante o mga kakunsabo sa tinunto, imbis mo depensa sa katawhan.
Mga driver sa taxi, trisikad ug mga pedicab nga mapahimuslanon, grabe kamahal kon mosingil sa pasahero, wa mo nahadlok nga gabaan sa inyong ginabuhat?
Apil man mo sa nagpalista aron modawat sa financial nga tabang sa gobyerno kay apektado mo sa crisis sa Covid-19! Kon wa mo nahadlok nga dunay karma, paabuta kay moabot ra na diha kaninyo.
Sa laing bahin, maglibog ta unsa nga balita ug kinsa ang angay tuohan karon tungod mga pro ug anti sa gobyerno pulos nisakay sa panahon aron iduso ang ilang personal nga interest.
Akong unahon ang mga supporter sa kasamtangan nga administrasyon nga mipakatag nga gidayeg kuno ni Queen Elizabeth II si Pangulong Rodrigo Duterte nga usa ka maayong lider panahon sa krisis sa Covid-19, apan bakak ang sugilanon kay wala bisan kausa gihisgutan sa Reyna sa England si President Duterte sa iyang pagpamulong sa iyang ginsakpan.
Ang mga "anti" sa gobyerno, maayo sab mobuhat og mga anggulo sa sugilanon aron dauton ang gobyerno sa tinguha nga sila ang mopuli.
Panahon karon nga unta ang mga Pinoy maghiusa, magsakripisyo alang sa kaayohan sa tanan. Hangtud sa barangay level daghan ang binuang, dili iapil sa listahan kon kalaban sa politika, mga bugas nga nindot, pangtagoan, kambyuhan sa bugas nga NFA nga maoy ihatag sa katawhan.
Nagpagamit mo kang satanas ug kamo ang katumanan sa gitagna sa Bibliya nga dili na gyod makab-ot ang paghiusa kay mao na kini ang kinaiya sa kalibutan hangtud sa katapusan.